“Për Maqedoni të bashkuar” ofruan katër kërkesa gjatë marshit të sotëm (Video)

Iniciativa qytetare “Për Maqedoni të bashkuar” gjatë marshit të sotëm në Shkup, dolën me katër kërkesa drejt partive politike në Maqedoni. Kole Manev në protestën e sotme para objektit të Kuvendit të Maqedonisë i lexoi kërkesat e tyre për siç tha për të gjitha etnitë në vend. Ata kërkuan nga partitë politike të refuzojnë platformat që janë shkruar jashtë vendit dhe të mos zbatojnë program qeverisës që nuk është votuar nga qytetarët, njofton Telegrafi Maqedoni.

“Kërkojmë nga partitë, veçanërisht nga OBRM-PDUKM dhe LSDM të mos lejojnë që në Kuvend të votohet për ligjin e dygjuhësisë në Maqedoni, për shkak se do të jetë ridefinim i Maqedonisë. Kërkojmë nga presidenti Ivanov ta respektojë Kushtetutën dhe të mos i ndajë mandatin për shkak se ka kaluar afati dhe për shkak se dhënia e mandatit do të thotë pranimi i një platforme të huaj nga një shtet tjetër, që do të thotë goditje ndaj Maqedonisë”, deklaroi Manev.

Përkrah marshit në Shkup, protesta të qeta pati edhe në disa qytete tjera të Maqedonisë./Telegrafi/