Pensionet e veteranëve të siguruara deri në janar të 2017-ës

Kryeministri i Kosovës Isa Mustafa në takimin e sotëm me përfaqësuesit e OVL së UÇK-së ka bërë të ditur që së paku deri në janarin e vitit të ardhshëm nuk pritet të ketë probleme me ndarjen e pagave.

Kryetari i OVL-UÇK-së, Smajl Elezaj në një prononcim për Indeksonline ka theksuar se në bisedën me kryeministrin është kërkuar që mos të ketë probleme çdo muaj për ndarjen e pagave.

“Me kryeministrin kemi biseduar që të mos kemi probleme çdo muaj për pagat e veteranëve dhe që këto paga nuk duhen të vihen asnjëherë në pikëpyetje”, ka thënë Elezaj.

Gjithashtu ai ka bërë të ditur se kryeministri ka theksuar se për këtë muaj janë bërë mbledhjet e mjeteve të nevojshme dhe që së paku deri në janar të vitit të ardhshëm nuk do të ketë probleme me ndarjen e pagave.

“Është biseduar gjithashtu që të ndalen propagandat e informimit se është rritur numri janë shtuar personat apo diçka të ngjashme në lidhje me veteranët”, ka shtuar Elezaj.

Elezaj ka theksuar po ashtu se është biseduar që së paku për këtë vit të mos ketë probleme pasi sipas tij “Është e pamundur që ne të bëjmë diçka në lidhje me numrin e rritur nga vendi ku ne jemi”.