Pas vendimit për shkarkimin e ambasadorëve, shërbimi i jashtëm diplomatik mund të mbetet vakant

Fshesa në diplomaci po shihet si veprim i ngutshëm që mund të sjellë pasoja për Kosovën.

Janë njohësit e çështjeve politike që kritikojnë këtë vendim të qeverisë.

Emir Abrashi nga Demokracia Plus thotë se reformat në diplomaci ishin të nevojshme por jo në këtë mënyrë.

“Lirimet nga detyra të 12 ambasadorëve njëkohësisht janë të ngutshme dhe nuk janë një vendim i menduar mirë, pasi në mënyrë automatike e lë Kosovën pa përfaqësim në nivel ambasadorësh në 12 shtete përnjëherë”, deklaroi Abrashi për RTV Dukagjinin.

E Belgzim Kamberi nga Instituti për Politika Sociale thotë se shërbimet diplomatike nga ky vendim mund të mbesin për një kohë të zbrazëta, përcjell Telegrafi.

“Ajo që është më e rëndësishme nga ky vendim, është se shërbimi ynë diplomatik mund të mbetet vakant në disa kryeqytete të rëndësishme botërore dhe kjo pastaj do ta vështirësonte pozicionin e Kosovës qoftë në procesin e integrimeve apo edhe në dialogun Kosovë-Serbi.

Kosova nuk ka përfaqësues diplomatik as në Washington, Bruksel, Londër e Tokio./Telegrafi/