Pas situatës së krijuar në Karaçevë, Osmani takon komandantin e KFOR-it: Qytetarët duhet të ndihen të sigurt në çdo cep të Kosovës

Kryetarja e Kuvendit të Kosovës, Vjosa Osmani, është takuar me komandantin e KFOR-it, gjeneralin Michele Rissi, me të cilin bisedoi për aspekte të sigurisë në vend dhe ndihmën që KFOR-i mund të japë në menaxhimin e pandemisë.

Osmani gjatë këtij takimi ka thënë se Republika e Kosovës ka përcaktuar kufijtë e saj më 17 shkurt të vitit 2008, ndërkaq theksoi se qytetarët e vendit duhet të ndihen të sigurt në secilën pjesë të vendit.

“Kosova i ka të përcaktuar kufijtë e saj që nga 17 shkurti i vitit 2008 dhe qytetarët e vendit duhet të ndihen të sigurt në çdo cep të vendit”, tha kryetarja Osmani.

Këto komente i bëri Osmani, pasi ditë më parë ishin parë xhandarmëria serbe në fshatin Karaçevë të Kamenicës, që është në vijën kufitare me Serbinë.

Lexo po ashtu Dalin pamje të reja të xhandarmërisë serbe në Karaçevë, kërkohet intervenimi i KFOR-it dhe institucioneve qendrore të Kosovës

Osmani tha se, si udhëheqëse e Kuvendit dhe përfaqësuese e popullit, e çmon jashtëzakonisht lart gatishmërinë e KFOR-it për të siguruar ambient të qetë dhe të sigurt, por kërkoi po kështu që bashkëpunimi i kësaj strukture ushtarake të thellohet me institucionet e sigurisë të Kosovës, në mënyrë që qytetarët e vendit të ndihen të sigurt dhe që të shmangen situatat, sikur ajo e Karaçevës, të cilat mund të ndikojnë që qytetarët e vendit të mos ndihen të sigurt.

Lexo po ashtu Hyrja e xhandarmërisë serbe në Karaçevë, kjo është përgjigja e KFOR-it

Osmani u njoftua me gatishmërinë e strukturave të NATO-s, përkatësisht të misionit të saj në Kosovë, për t’u dalë në ndihmë qytetarëve dhe institucioneve të vendit në menaxhimin e pandemisë Covid-19.

Gjeneral Risi shprehu gatishmërinë e strukturës që ai e udhëheq, që KFOR-i të ofrojë të gjitha kapacitetet e nevojshme për ndihmë popullit dhe institucioneve të Kosovës për menaxhimin e kësaj pandemie. /Telegrafi/