Pas pezullimit të grevës, provimet në Universitetin e Prishtinës mbahen nga 6 shkurti

Tri javë grevë në arsim, kanë bërë që të ndryshojnë datat e mbajtjes së provimeve në Universitetin e Prishtinës.

Pas vendimit të SBASHK-ut për pezullimin e kësaj greve, UP-ja ka njoftuar se provimet do të mbahen që nga data 6 shkurt.

Për paraqitjen e provimeve, afati do të jetë i hapur më 4 dhe 5 shkurt, transmeton Telegrafi.

Lexo po ashtu SBASHK-u vendos ta pezullojë grevën: Mësimi fillon të hënën

“Në këtë takim, senatorët u pajtuan që nga e hëna, 4 shkurt 2019, të filloj procesi i organizimit të provimeve si në afatet kohore në vijim: SEMS-i për paraqitje të provimeve do të jetë i hapur në datat 4 dhe 5 shkurt 2019; Datat e mbajtjes së provimeve: 6 shkurt 2019 deri me 28 shkurt 2019 (përjashtim nga këto data bëjnë ditët e festave zyrtare)”, thuhet në njoftimin e UP-së.

Pas provimeve, semestri veror në Universitetin e Prishtinës pritet të fillojë me 25 shkurt.

“Si rrjedhojë e kësaj, obligohen dekanët e njësive akademike që të riorganizojnë datat e provimeve për javët e humbura, sipas specifikave të njësive përkatëse.Po ashtu, informoheni se semestri veror për vitin akademik 2018-2019, në UP, fillon me datë 25 shkurt 2019”, përfundon komunikata e Universitetit të Prishtinës. /Telegrafi/