Partitë politike konfirmojnë pjesëmarrjen në tryezën e thirrur nga Veseli

Të martën pritet të mbahet tryeza e diskutimit në mes partive politike, e cila është thirrur nga kryetari i PDK-së, Kadri Veseli.

Kjo tryezë e cila ka për qëllim arritjen e konsensusit politik për agjendën shtetërore të Kosovës, pritet që të mbledhë në takim të gjithë përfaqësuesit e subjekteve politike.

Nënkryetari i PDK-së, Memli Krasniqi ka thënë për Telegrafin se beson që të gjitha partitë do të jenë të martën në këtë takim.

“Besoj se të gjitha partitë e ftuara do t’i dërgojnë përfaqësuesit e tyre”, u shpreh Krasniqi.

Edhe zyrtarë të partive tjera politike kanë konfirmuar se do të marrin pjesë në këtë tryezë. Shefi i Grupit Parlamentar të LDK-së, Avdullah Hoti ka thënë për Telegrafin se do të marrin pjesë, pasi që sipas tij kjo tryezë është e iniciuar nga LDK-ja.

“Po do të marrim pjesë sepse është tryezë e iniciuar nga LDK dhe ka nevojë të arrihet sa më parë një marrëveshje për të nxjerrë vendin nga kriza politike. LDK-ja do të përfaqësohet nga nënkryetari Agim Veliu”, ka thënë Hoti.

Edhe Lëvizja Vetëvendosje ka thënë se do të jetë e pranishme në këtë tryezë. “Po do të merr pjesë Glauk Konjufca në emër të VV-së”, ka thënë për Telegrafin, zëdhënësja e VV-së, Tinka Kurti.

Pjesëmarrjen në këtë tryezë e ka konfirmuar edhe  Nisma Socialdemokrate.

“Ashtu sikur që kemi deklaruar edhe për takimin e ftuar nga LDK javën e kaluar, Nisma Socialdemokrate konsideron se takimet mes partive politike janë të mirëpritura. Nisur nga kjo, Nisma do të marrë pjesë në të gjitha takimet e ftuara nga partitë politike”, u shpreh shefi i GP-së të Nismës, Bilall Sherifi.

Telegrafi ka provuar të marrë një qëndrim edhe nga zyrtarë të AAK-së dhe Grupit të Deputetëve të Pavarur, mirëpo të njëjtit nuk kanë kthyer përgjigje.

Takimi i thirrur nga kryetari Veseli do të mbahet të martën në ora 13:00, në sallën C301, në Kuvendin e Kosovës.

Në këtë tryezë, Veseli ka propozuar të diskutohet për çështjet më prioritare për shtetin, me theks të veçantë për: fazën përfundimtare të dialogut për normalizimin e marrëdhënieve Kosovë-Serbi, hartimin e Statutit për Asociacionin e Komunave me Shumicë Serbe, agjendën e integrimeve evropiane, formimin e Ushtrisë së Kosovës, reformën zgjedhore. /Telegrafi/