Parlamenti hungarez po debaton për pranimin e Finlandës dhe Suedisë në NATO

Hungaria ka një reputacion ‘rebeli’ në Bashkimin Evropian dhe nëse do ta konfirmojë këtë reputacion edhe një herë, do ta tregojë debati në parlamentin hungarez për pranimin e Finlandës dhe Suedisë në NATO.

Vetëm Hungaria dhe Turqia nuk i kanë ratifikuar ende protokollet për anëtarësimin e këtyre dy vendeve në NATO, më shumë se tetë muaj pasi liderët e Aleancës vendosën t’i pranojnë ato si anëtarë në samitin e Madridit, transmeton Telegrafi.

Dhe ndërsa anëtarët e tjerë të NATO-s janë më të shqetësuar për mundësinë që Turqia të bllokojë pranimin e dy vendeve – presidenti turk Recep Tayyip Erdogan po bllokon Suedinë, duke pretenduar se vendi mbron militantët kurdë – qeveria e Viktor Orban po vonon gjithashtu procedurën parlamentare.

Ratifikimi përfundimisht do të fillojë në Hungari sot, kur do të fillojë debati në parlament, ndërsa votimi për vetë çështjen pritet në gjysmën e dytë të marsit, shkruan Politico. Por tashmë ka indikacione se nuk do të shkojë mirë.

Lexo po ashtu Shefi i NATO-s: Është koha që Finlanda dhe Suedia të na bashkohen

Mate Kocsis, kryetar i grupit parlamentar të Fidesz të Orbanit, tha javën e kaluar se kishte një “diskutim serioz” rreth anëtarësimit të dy vendeve në Organizatën e Traktatit të Aleancës.

Hungaria planifikon të dërgojë një delegacion në Suedi dhe Finlandë për të diskutuar “mosmarrëveshjet politike” që kanë lindur. Një këndvështrim të tillë e shprehu edhe vetë Orban.

“Edhe pse ne mbështesim pranimin e Suedisë dhe Finlandës në NATO, së pari duhet të kemi një diskutim serioz”, tha ai në një intervistë.

Duke kujtuar se Finlanda dhe Suedia e kanë kritikuar më parë Hungarinë për sundimin e ligjit, ai tha se disa në partinë e tij pyesin veten nëse është e mençur të pranohen vende që “përhapin gënjeshtra të hapura për Hungarinë, për sundimin e ligjit në Hungari, për demokracinë, për atë sesi jetohet në këtë vend”.