Olly fiton edicionin e 75-të të festivalit ‘Sanremo’

Pas pesë netëve të jashtëzakonshme plot emocione, Festivali “Sanremo 2025” ka ardhur zyrtarisht në përfundim. Edicioni i 75-të i “Sanremos” dhuroi momente të paharrueshme, të qeshura dhe, mbi të gjitha, muzikë të mrekullueshme. 

Pas kombinimit të votave nga juria e shtypit, juria e radios dhe televotimi, gjithçka u bë zyrtare: Artisti Olly, emri i vërtetë i të cilit është  Federico Olivieri, është fituesi i “Sanremo 2025”. Me këngën “Balorda Nostalgia”, Olly rrëmben trofeun dhe shkruan emrin e tij përgjithmonë në historinë e “Sanremos”.

Të 29 konkurrentët u ngjitën për herë të fundit në skenë me shpresën për të kaluar në Superfinale. Renditja nga tre netët e para u kombinua me atë të natës finale për të përcaktuar klasifikimin përfundimtar të të gjithë artistëve.

Pesë këngëtarët më të votuar kaluan në një raund tjetër votimi, i cili u nda në tri pjesë: 33% juria e shtypit, 33% juria e radios dhe 34% televotimi, për të përcaktuar fituesin.

Për natën e fundit, krahas prezantuesit të njohur Carlo Conti, bashkë-prezantues ishin Alessia Marcuzzi dhe Alessandro Cattelan, ky i fundit i njohur edhe si një nga tre prezantuesit e “Eurovision 2022” në Torino. Të tre së bashku sollën një spektakël të mrekullueshëm, duke mbyllur në mënyrën më të bukur këtë edicion të festivalit legjendar.

A do të shkojë Olly në Eurovision 2025?

Olly ka opsionin për të përfaqësuar Italinë në “Eurovision Song Contest 2025”. Nëse ai refuzon, nënkampioni, Lucio Corsi do të ketë opsionin të jetë përfaqësuesi italian në Bazel.

Vendimi do të bëhet i ditur në konferencën për media të dielën pasdite. /Telegrafi/