OBRM-PDUKM kërkon që Qeveria të mbështesë projektligjin e tyre për energjinë

Grupi i deputetëve të OBRM-PDUKM-së sot ka dorëzuar kërkesë në Kuvend për mbajtjen e seancës urgjente për projektligjin e parashtruar nga OBRM-PDUKM, i cili ka të bëjë me Ligjin për energjetikë, bëri të ditur sot koordinatori i Grupit të deputetëve të OBRM-PDUKM-së Nikolla Micevski në konferencë për shtyp në Kuvend.

Sipas Micevskit, Qeveria ka përshkruar disa nga masat e propozuara që ata si si OBRM-PDUKM i kanë ofruar.

“Atë që Kovaçevski e prezantoi nuk është e mjaftueshme. Në masat të cilat Kovaçevski i prezantoi, dëgjuam se do të kenë energji më të lirë elektrike institucionet arsimore dhe shëndetësore publike, por rastësisht apo jo, i la jashtë ndërmarrjet për menaxhim me ujin dhe ato komunale, të cilat për shkak të çmimeve të larta të energjisë elektrike, kishin problem me likuiditetin dhe mund të çojë në rritjen e faturave të familjeve dhe ekonomisë”, tha Micevski.

Ai theksoi se kërkojnë pranim të plotë, e jo të pjesshëm të propozimit të tyre.

“Me projektligjin për energjetikë që e ka dorëzuar OBRM-PDUKM-ja, përfshihen edhe ndërmarrjet për menaxhim me ujin dhe ato komunale që kanë shpenzime të mëdha për energji elektrike. Nëse LSDM-ja, Qeveria dhe Kovaçevski vërtet kujdesen, le ta mbështesin ligjin tonë për energjetikë”, thekson Micevski, duke shtuar se kjo drejtpërdrejtë do t’ua lehtësojë qytetarëve të mos vijë në shtrenjtimin e shërbimeve lidhur me furnizimin me ujë.