Nuk do të ketë trupa italiane në misionet e mundshme në Ukrainë, thotë Meloni

Kryeministrja Giorgia Meloni theksoi të shtunën se asnjë trupë italiane nuk do të vendoset në një operacion të mundshëm paqeruajtës në Ukrainë gjatë një takimi virtual të organizuar nga kryeministri britanik Keir Starmer.

“Asnjë pjesëmarrje kombëtare nuk është planifikuar në një forcë të mundshme ushtarake në terren”, tha Meloni gjatë takimit virtual për Ukrainën, shkruajnë mediat e huaja, përcjell Telegrafi.

Meloni mori pjesë në takimin online të organizuar nga Starmer për të diskutuar përkushtimin për një paqe të drejtë dhe të qëndrueshme që siguron sovranitetin dhe sigurinë e ardhshme të Ukrainës.

Në këtë kuadër, kryeministrja tha se Italia synon të vazhdojë të punojë me partnerët evropianë dhe perëndimorë dhe me Shtetet e Bashkuara për të përcaktuar garancitë e besueshme dhe efektive të sigurisë.

Meloni foli në telefon me Starmer përpara se të merrte pjesë në takimin virtual që ai priti me disa liderë ndërkombëtarë në të ashtuquajturin ‘koalicion të të gatshëmve’ të angazhuar për të garantuar një armëpushim në Ukrainë.

Përfaqësuesit e 26 vendeve, plus NATO dhe BE, morën pjesë në takimin virtual, duke përfshirë presidentin francez Emmanuel Macron, presidentin ukrainas Volodymyr Zelensky, kryeministrin e ri të Kanadasë, Mark Carney dhe Sekretarin e Përgjithshëm të NATO-s, Mark Rutte. /Telegrafi/