Nuhiu flet pas fitores: Nuk e nënvlerësuam Vushtrrinë, ndonjëherë duhet t’i fitosh ndeshjet edhe në këtë mënyrë

Drita ka marrë një fitore shumë të vështirë në udhëtim te Vushtrria.

Bardhekaltërtit kanë triumfuar me rezultat 2-3, në një ndeshje ku vendasit barazuan dy herë rezultatin.

Numri një i bankës së Dritës, Ardian Nuhiu pas ndeshjes ka folur duke thënë se skuadra e tij në asnjë moment nuk e nënvlerësoi kundërshtarin.

“Ndeshjet e tilla janë më të vështira. Edhe pse nuk e nënvlerësuam ekipin kundërshtar. Ndoshta tereni ishte i papërshtatshëm, pasi që ne nuk mundëm të luanim lojën tonë”.

“Në fund janë më të rëndësishme pikët. Ndonjëherë ndeshjet duhet ti fitosh edhe në këtë mënyrë. I uroj futbollistët për fitoren e realizuar. Uroj edhe kundërshtarin për luftën që e bënë deri në fund”, deklaroi Nuhiu për “Super Sport Kosova”.

Tutje trajneri i klubit gjilanas foli edhe për mungesat që kishte Drita në këtë takim, duke thënë se gjithë futbollistët janë të rëndësishëm.

“Të gjithë futbollistët janë të rëndësishëm. Uroj që secili futbollist që ka minuta në dispozicion ti shfrytëzojë sa më mirë”, përfundoi Nuhiu.

Me këtë fitore Drita i bashkohet Ballkanit në kreun e tabelës me nga 37 pikë, por që ka një ndeshje më shumë të zhvilluar. /Telegrafi/