Christian Pulisic mund të rikthehet në Ligën Premier tre vjet pas largimit të tij.
Sipas TEAMtalk, katër klube angleze tashmë kanë kontaktuar me përfaqësuesit e sulmuesit amerikan, i cili duket i gatshëm të rikthehet në kampionatin ku regjistroi 145 ndeshje zyrtare me Chelsea, duke shënuar 26 gola dhe dhënë 21 asistime.
Interesi vjen nga Tottenham, Liverpool, Arsenal dhe Manchester United, me Spurs që sipas burimeve kryesojnë garën për shërbimet e tij.
Pulisic do ta konsideronte shumë pozitive mundësinë për të punuar nën drejtimin e Mauricio Pochettino, i cili pritet të bëhet trajneri i ri i klubit londinez verën e ardhshme.
Aktualisht, amerikani tashmë bashkëpunon me Pochettino në përfaqësuesen e SHBA-së.
Nga ana e Milanit, klubi ku ai luan aktualisht, nuk e përjashtojnë largimin e tij verën e ardhshme, por vetëm në rast se do të arrijnë një ofertë që të kompensojë me fitim investimin prej mbi 20 milionë eurosh të bërë për transferimin e tij.
Pulisic është shumë i aftë të luajë si në të dy krahët e sulmit ashtu edhe në rolin e mesfushorit sulmues.
Me Milanin ai ka zhvilluar 120 ndeshje zyrtare, ka shënuar 42 gola dhe ka dhënë 25 asistime.
Gjithashtu, ai mbetet një pjesë kyçe e përfaqësueses së SHBA-së, me të cilën ka luajtur 82 ndeshje dhe ka shënuar 32 gola. /Telegrafi/
