Një faturë për artin “e padukshëm” mund të arrijë gjysmë milioni dollarë në ankand

Në vitin 1958, artisti Yves Klein hapi një ekspozitë të quajtur “The Void” (Boshllëku), ku vendosi një kabinë në një dhomë bosh. Mijëra vizitorë paguan për të shkuar në një galeri të Parisit, për të parë asgjë.

Pas suksesit të shfaqjes, artisti francez më pas e çoi idenë një hap më tej, duke u dhënë koleksionistëve mundësinë për të blerë një sërë hapësirash inekzistente dhe tërësisht konceptuale, në këmbim të një peshe ari të pastër.

Dhe, tani, pothuajse 60 vjet pas vdekjes së Kleinit, një nga faturat që ai shkroi për të vërtetuar pronësinë e veprave të tij të padukshme është në shitje dhe shtëpia e ankandeve “Sotheby’s” vlerëson se mund të arrijë deri në 500 mijë euro.

Me përmasa më pak se 20 centimetra të gjerë, fatura jep pronësinë e një prej hapësirave imagjinare të Kleinit, të cilën ai e quajti “Zonat e ndjeshmërisë jomateriale”. I krijuar për t’i ngjasuar një çeku bankar, ai është i nënshkruar nga artisti dhe i datës 7 dhjetor 1959.

“Fatura iu dha fillimisht tregtarit Jacques Kugel dhe është ndër të paktët që mendohet se ka mbijetuar”, tha “Sotheby’s” në një deklaratë për shtyp. Kjo sepse Klein u ofroi klientëve të tij një zgjedhje: të ruanin faturën e tyre ose ta digjnin në një ritual. Nëse ata do të kishin zgjedhur këtë të fundit, do të konsideroheshin “pronari përfundimtar” i veprës së artit konceptual.

Kugel zgjodhi ta mbajë të tijën dhe që atëherë është shfaqur në institucionet kryesore të artit në të gjithë Evropën, përfshirë Galerinë “Hayward” të Londrës dhe Qendrën “Pompidou” në Paris.

Duke e krahasuar idenë e Klein, “Sotheby’s” tha se do të pranojë pagesa në kriptomonedhë.

“Sotheby’s” konfirmoi gjithashtu se personi që do ta blejë faturën “nuk do të bëhet vetëm pronari i kësaj faturë historike, por edhe i veprës së padukshme të artit të Kleinit”. /Gazeta “Si”/