Një burrë nga Konektikat i njohur si “Croc King” ka arritur të futet në librin e rekordeve Guiness, duke mbledhur 3,569 palë sandale Crocs.
Doogie Sandtiger tha se dashuria e tij për sandalet filloi në moshën 16 vjeç, për shkak të fëmijërisë së tij në kujdestari, duke e lënë pa njohuri se si t'i lidhte këpucët, transmeton Telegrafi.
"Një pjesë e sistemit të kujdestarisë që njerëzit nuk e kuptojnë është se ka shumë gjëra që fëmijët nuk i mësojnë ose nuk i kuptojnë gjatë rrugës", tha Sandtiger.
Sandtiger tha se bëri një listë me qëllime në ditarin e tij kur ishte adoleshent dhe kështu filloi të koleksiononte.
"E quaja listën time të qëllimeve dhe për çfarëdo arsye, vendosa 366 palë Crocs - ky ishte qëllimi fillestar", tha Sandtiger.
Ai filloi të kërkonte një rekord botëror Guinness për koleksionin e tij në vitin 2023, kur koleksioni i tij tejkaloi 2,000 palë.
Më në fund u vlerësua me titullin për koleksionin më të madh të sandaleve Crocs kur koleksioni i tij u numërua në 3,569 palë - por numri ka vazhduar të rritet që kur u krye ky numërim në nëntor 2024.
Sandtiger tha se koleksioni i tij i kaloi 3,800 këtë muaj. Adhuruesi i këpucëve tha se shpreson që përfundimisht ta shfaqë koleksionin e tij duke hapur një "Crocseum". /Telegrafi/
