Nisma: Thaçi po bën presion tek qytetarët e Drenasit (Foto)

Dega e Nismës për Kosovën në Drenas gjatë ditës së djeshme ka bërë publike disa foto ku tregojnë qartë se Presidenti i vendit, Hashim Thaçi, është duke ftuar kryetarët e fshatrave, njerëz të biznesit, dhe qytetarë të thjeshtë të komunës së Drenasit, dhe duke ushtruar presion mbi ta për të votuar kandidatin e PDK-së në zgjedhjet për kryetar komune që do të mbahen më 18 dhjetor në Drenas.

Sipas Nismës, presidentit Thaçi nuk i kanë mjaftuar takimet në zyrën e tij në funksion të fushatës, dhe ai ka filluar të zhvilloj takime me qytetarë nëpër oda dhe restorante të ndryshme, në funksion të fushatës zgjedhore në Drenas.

“Pjesëmarrja e tij në fushatën zgjedhore në Drenas, është jashtë përgjegjësive të Presidentit dhe në kundërshtim dhe shkelje e rëndë e Kushtetutës së Kosovës”, thuhet në një komunikatë të Nismës.

Sipas Nismës, qytetarët e Drenasit tashmë kanë vendosur për ta ndryshuar këtë mentalitet aspak të ndershëm të instaluar në Drenas nga PDK-ja, parti kjo që me vite të tëra i ka sjellë vetëm dëme komunës së Drenasit.

“Të gjithë strukturat drejtuese të PDK-së e kanë të kotë, duke përfshirë edhe Presidentin, sepse qytetarët e Drenasit kanë vendosur për ndryshime, dhe ndryshimi do të vjen vetëm me kryetarin e ardhshëm të qytetarëve të Drenasit, Isa Xhemajlaj”, thuhet në komunikatën e Nismës. /Telegrafi/