Nis festivali “Mitrovica Guitar Days”, në natën e parë përformoi artistja spanjolle Montesinos

Në qytetin e Mitrovicës mbrëmë është mbajtur nata e parë e edicionit të gjashtë të festivalit “Mitrovica Guitar Days”.

Ky festival filloi më 6 shtator dhe do të zgjasë deri më 11 shtator. Përgjatë këtyre ditëve, festivali do të mbahet tek Muzeu i Qytetit dhe koncertet do të fillojnë në orën 19:30.

Në natën e parë të festivalit performoi artistja me prejardhje spanjolle, Anabel Montesinos, shkruan Telegrafi.

Themeluesi i festivalit “Mitrovica Guitar Days”, Erhan Mujka, në një prononcim për Telegrafin ka thënë se përgatitjet për këtë edicion kishin filluar menjëherë pas përfundimit të edicionit të pestë.

“Kemi arritur të përgatitemi në mënyrën më të mirë. Tash jemi afër fillimit të festivalit”, ka thënë Mujka.

Mujka ka bërë të ditur se gjatë këtyre ditëve në këtë festival do të performojnë artistë nga e gjithë bota, siç është shprehur ai, prejardhja e tyre është nga Spanja deri në Japoni.

“Sivjet do të kemi pesë artistë ndërkombëtarë dhe katër artistë shqiptarë. Artistët ndërkombëtarë janë prej artistëve më të njohur të botës për kitarën klasike. Jemi shumë të lumtur që kemi arritur këta artistë t’i sjellim në Mitrovicë për edicionin e gjashtë, i cili çdo vit e më shumë po vazhdon të bëj bujë në Kosovë dhe Evropë”, ka thënë tutje themeluesi i festivalit “Mitrovica Guitar Days”.

Mujka ka treguar se qëllimi i këtij festivali është t’i sjellin artistët e njohur ndërkombëtarë në Mitrovicë, në Kosovë, transmeton Telegrafi.

“Qëllimi është të iu ofrojmë kosovarëve dhe Mitrovicës koncerte dhe artistë që ndoshta nuk mund t’i ndjekin në Evropë, por ne i sjellim në Kosovë. Këtë e kemi arritur deri tashmë më shumë sukses sepse ata (artistët ndërkombëtarë) vetëm se po vijnë “, ka shtuar ai.

Më tej, ai ka theksuar se në çdo koncert sallat gjithherë ishin plot publik dhe shpreson që dhe këtë vit të jetë njësoj, derisa ka potencuar se deri më tani ka pasur mjaft interesim nga qytetarët për festivalin “Mitrovica Guitar Days”.

Mujka ka deklaruar se interesim për këtë festival ka nga të gjitha grupmoshat.

“Të gjitha moshat e vizitojnë festivalin dhe ky festival është atraktiv për të gjitha moshat”, ka përfunduar themeluesi i festivalit “Mitrovica Guitar Days”, Erhan Mujka. /Telegrafi/