Nimetz: Jam lodhur me përdorimin e referencës IRJM, Prespa është kulmi i karrierës sime

Diplomati amerikan Matthew Nimetz, i cili gati 25 vjet ka ndërmjetësuar për kontestin e emrit mes Maqedonisë dhe Greqisë, në një intervistë për “Deutsche Welle” ka thënë se edhe pas nënshkrimit të Marrëveshjes së Prespës më 17 qershor 2018, nuk ka qenë e sigurt nëse puna do të shkojë deri në fund.

Ai thotë se ditën e nënshkrimit të marrëveshjes nuk e kujton vetëm për shkak të ditëlindjes së 79 të tij që e festoi në bregun e Liqenit të Prespës, por edhe si ditë të rëndësishme të jetës së tij, të cilën e cilëson si kulmi i karrierës, përcjell Telegrafi Maqedoni.

Nimetz thotë se është lodhur duke e përdorur referencën “ish-Republika Jugosllave e Maqedonisë, emër për të cilin siç thotë, nuk ka qenë emër.

“Referenca e përkohshme e OKB-së nuk ishte emri i shtetit. Ajo është sikur unë dhe gruaja ime të kemi fëmijë dhe në spital ta regjistrojnë si ‘djali i zotëri Nimetz’. Dhe nëse fëmija 20 vjet shëtitet pa emër, ai ose ajo do të rritet në situatë të papërshtatshme”, tha Nimetz.

Nga aspekti i sotëm mendon se periudha e vetme në të kaluarën kur ndoshta do të ishte zgjidhur çështja e emrit, u hap menjëherë pas samitit të NATO-s në Bukuresht në vitin 2008./Telegrafi/