Ngjarja tragjike në Shqipëri, pamje nga aksioni i RENEA-s pas ekzekutimit të 62 vjeçarit në Maliq

Një ngjarje e rëndë ka tronditur sot Shqipërinë, ku në fshatin Qesarakë, të Maliqit një 62-vjeçari u ekzekutua nga forcat RENEA pas shkëmbimit të zjarrit që pati për rreth një orë me ta.

Ramiz Muçllari i armatosur u mbyll në banesën ku jetonte, e mbrëmjen e kaluar tentoi të vriste gruan dhe djalin e tij.

Sipas një postimi në rrjetin social në Facebook të Policisë së Shtetit thuhet se Forcat Speciale “Renea”, në bashkëpunim me Policinë lokale të Komisariatit të Policisë Maliq dhe shërbimet e Drejtorisë Vendore të Policisë Korcë, prej më shumë se 8-orësh mbajtën të rrethuar në fshatin Qesarakë, Maliq, banesën e shtetasit Ramiz Muçollari, i cili mbrëmjen e djeshme  plagosi me thikë bashkëshorten dhe djalin e tij.

Lexo po ashtu Plagosi gruan e djalin dhe s’iu dorëzua policisë, RENEA ekzekuton 62-vjeçarin në Maliq

“Shtetasi Ramiz Muçollari, pas plagosjes së dyfishtë  u mbyll në banesë dhe  nuk i’u përgjigj thirrjes së Policisë Vendore për t’u dorëzuar, por ka qëlluar me armë zjarri (mitraloz të lehtë) në drejtim të tyre.

Ndodhur në këto kushte  janë dërguar me urgjencë në vendngjarje, Forcat Speciale “Renea”, të cilat kanë marrë nën kontroll perimetrin e afërt të sigurisë, ndërsa policia lokale është pozicionuar në perimetrin e largët të sigurisë”, thuhet në njoftim.

Tutje bëhet e ditur se përgjatë natës, Forcat  Speciale “Renea”, i kanë bërë thirrje të pandërprera për t’u dorëzuar, por 62-vjeçari nuk i është bindur thirrjeve të Policisë për t’u dorëzuar dhe ka vijuar të qëllojë me armë zjarri drejt Policisë.

“Në mëngjesin e sotëm, Forcat Speciale ‘Renea’, kanë mundur të hyjnë deri në katin e dytë të banesës së shtetasit Ramiz Muçollari, i cili ishte ngjitur në papafingon e banesës dhe ka hapur zjarr në drejtim të Forcave Speciale ‘Renea’, duke rrezikuar seriozisht jetën e tyre.

Forcat Speciale ‘Renea’, në zbatim të plotë të procedurave standarte janë kundërpërgjigjur me zjarr dhe përreth një orë ka vijuar shkëmbimi i zjarrit. Si pasojë e shkëmbimit të zjarrit, 62- vjeçari ka humbur jetën”, thuhet ndër të tjera në njoftim.

Po ashtu Policia e Shtetit bëri të ditur se shtetasi Ramiz Muçollari, vuante nga probleme të shëndetit mendor dhe gjatë ditës së djeshme ka qenë për vizitë me familjarët në spitalin psikaitrik, por nuk është shtruar në spital, dhe në mbrëmje kur janë kthyer në banesë ka nisur konfliktin me familjarët.

Grupi hetimor ndodhet në vendngjarje dhe nën drejtimin e Prokurorisë vijon kqyrja e vendit të ngjarjes për dokumentimin e plotë ligjor të këtij rasti. /Telegrafi/