Jalen Blesa është një nga ato histori futbolli që nisin qetë, larg vëmendjes së madhe, por shpërthejnë papritur dhe marrin formën e një karriere që askush nuk e parashikoi.
Sulmuesi amerikano-spanjoll, në Kosovë zbarkoi te Rahoveci, ku Prishtina e vërejti talentin e tij. Blesa që shkëlqeu te Prishtina, sot është kthyer në një sensacion të Serie B në Itali, ku po udhëheq me gola, minuta dhe paraqitje mbresëlënëse.
Shkëlqimi në Prishtinë – vendi ku nisi ngritja
I panjohur për publikun kosovar kur mbërriti, Blesa u shndërrua shpejt në një pikë referimi në sulm te FC Prishtina. Në vetëm një edicion, 24-vjeçari realizoi 11 gola dhe dhuroi 4 asistime, duke u bërë një nga lojtarët më produktivë të skuadrës.
Aftësia për të lëvizur mes vijave, shpejtësia dhe finalizimi i saktë e bënë të dukej si një sulmues i përmasave më të mëdha se kampionati vendor.
Pikërisht këtu ai mori vëmendjen e skautëve evropianë – dhe hapi i parë jashtë Kosovës erdhi shpejt.
Rumania, kapitulli më i shkurtër, por vendimtar
Në shkurt të vitit 2024, Blesa u transferua te Universitatea Craiova për 165 mijë euro. Por aventura rumune zgjati pak dhe ishte tejet e ftohtë: vetëm 109 minuta në 4 ndeshje, pa gol dhe pa asist. Në verë, pas një huazimi në Gjeorgji, trajneri Mirel Radoi vendosi të hiqte dorë prej tij.
Dukej sikur investimi i Craiovas kishte dështuar dhe se Blesa ishte një “bast i humbur”. Por pikërisht këtu nisi kthesa.
Gjeorgjia – rikthimi i formës
I huazuar te Dinamo Batumi, sulmuesi pati një sezon të shkëlqyer: 9 gola në 28 ndeshje, paraqitje vendimtare në kualifikime të Ligës së Kampionëve dhe Ligës së Konferencës.
Ishte sinjali i parë se kualiteti i tij po rikthehej – dhe se aventura e dështuar në Rumani nuk ishte fundi.
Italia, shpërthimi i madh – Blesa bëhet hit i Serie B
Pas largimit nga Craiova, Blesa nënshkroi me Cesenën, një emër historik në futbollin italian. Dhe sot, në Serie B, ai është kthyer në një sensacion të vërtetë.
Në 14 ndeshjet e para të sezonit, 4 gola, paraqitje titullari dhe një nga surprizat e kampionatit.
Cesena ndodhet në zonën e play-off-it dhe po lufton seriozisht për ngjitje në Serie A – ku Blesa është bërë një nga lojtarët kyç, me klubin që ia ka rinovuar kontratën deri në vitin 2028.
Kur mbërriti në Banie, ai vlente 250,000 euro. Sot, sipas Transfermarkt, vlera e tij ka trefishuar, duke arritur në 750,000 euro. Rritje që pasqyron formën, golat dhe ndikimin e tij në Itali.
Nëse vazhdon me këtë ritëm, shumë shpejt emri i tij do të dëgjohet në Serie A, me klubet që kanë filluar interesimin. /Telegrafi/
