Nesër fillon pastrimi i përgjithshëm i Shkupit

Bashkia e Shkupit në periudhën e ardhshme, do të zhvillojë një aksion të madh për pastrimin e rrugëve me qëllim uljen e ndotjes dhe i cili që do të realizohet në të gjitha komunat në qytet në periudhë prej 20 ditësh.

Përveç ndërmarrjeve publike me mekanizimin e tyre, në këtë aksion do të angazhohen edhe personat e papunë si fuqi punëtore shtesë. Këto persona do të angazhohen në bashkëpunim me Ministrinë e Punës dhe Politikës Sociale dhe Agjencinë e Punësimit të Republikës së Maqedonisë. Personave të angazhuar do t’u sigurohet honorar, kompensim për ushqim dhe transport i paguar me autobus, përcjell Telegrafi Maqedoni.

“Fillojmë nga Buteli, pastaj vazhdojmë në të gjitha komunat në qytet, pas një ose dy ditëve për secilën komunë varësisht nga madhësia. Pas përfundimit të pastrimit të komunave, do të kalojmë në pastrimin e bregut të lumit Vardar”, tha kryetari Shilegov para gazetarëve.

Kjo është një nga masat afatshkurtra për uljen e ndotjes në qytet. Është planifikuar që të pastrohen dhe të lahen rrugët nga pluhuri që është shtresuar me vite./Telegrafi/