Mustafa: Investimet kapitale për herë të parë mbi 700 milionë euro

Kryeministri Isa Mustafa, tha se gjatë hartimit të buxhetit kanë trajtuar të gjitha kërkesat.

“Kemi arritur që të ofrojmë një buxhet i cili siguron zhvillim dhe që reflekton programin qeveritar, për zhvillim, rritje ekonomike, mirëqenie sociale dhe për të ruajtur stabilitetin financiar”, theksoi Mustafa.

Sipas tij, rritja ekonomike do të jetë më e madhe se 4.1 për qind sa ka qenë. Ai theksoi se ka ra norma e papunësisë.

Mustafa tha se duhet punuar më shumë për tërheqjen e investimeve të huaj dhe investimeve private.

“Përmes këtij buxheti, për herë të parë prej mbi 2 miliardë euro, Qeveria synon ta rris investimin në fushën kapitale në mbi 700 milionë euro ose mbi 45 për qind në vitin e ardhshëm, në krahasim me këtë që kemi pasur këtë vit. Ne vlerësojmë se këto investime do të ndikojnë në mënyrë të drejtpërdrejt në rritjen ekonomike të vendit. Rritja e investimeve kapitale, siç u tha, do të përkrahet nga huamarrja, por rritja e bruto produktit vendor ose GDP-së, është mjaft e lartë, apo dyfish më e madhe sesa borxhi publik, prandaj kjo situatë në asnjë rast nuk e rëndon ngarkesën e bruto produktit vendor me borxhin publik, sepse Kosova edhe ashtu mbetet vendi me nivelin më të ulët të borxhit, ose të pjesëmarrjes së borxhit në bruto produktin vendor”, theksoi Mustafa. /Telegrafi/