Mustafa: Buxheti real është 2.6 miliardë euro e jo 3.2 miliardë euro, Ministria e Financave po tenton të bëjë shkelje kushtetuese

Deputeti i Lidhjes Demokratike të Kosovës (LDK), Besian Mustafa ka theksuar se buxheti real për vitin 2023 është 2.6 miliardë euro e jo 3.2 miliardë euro aq sa pretendon Qeveria.

Mustafa në seancën e Kuvendit të Kosovës është shprehur se Ministria e Financave po tenton të bëjë shkelje kushtetuese lidhur me ndarjet buxhetore për komunat.

“Kjo lëvdata se kemi buxhet më të madh në histori nga secili vit në vit ka qëndruar që nga 1999 e do të vazhdoj kështu edhe për dekada me radhë. Kemi një inflacion për produktet esenciale dhe ndërtimore që kalon shifrën 20 për qind, që i bie që buxheti real është 2.6 miliardë euro e jo 3.2 miliardë euro. Përkundër kësaj, kur vjen çështja të ministritë nuk kemi zgjidhje, pro nuk zgjidhjet asnjë problem, pra kemi një ndarje anemike”, tha Mustafa.

Sipas tij, nuk është ndarë asnjë cent në rritjen e kapaciteteve gjeneruese energjetike.

“Asnjë cent për rritjen e kapaciteteve gjeneruese energjetike, e Kosova ndodhet në krizë energjetike. Te shëndetësia, përveç që nuk kemi ministër, nuk kemi asnjë cent për reformimin e këtij sektori. Ka shkurtim të vendeve të punës në sektorin e arsimit, ku për vitin 2023 do të këtë më pak mësimdhënës e arsimtar në shkollat e Kosovës”, u shpreh ai.

Ai thekson se ka performancë të dobët të realizimit të projekteve.

“E gjithë rinia e Kosovës do të duhet të mjaftohet me një buxhet prej 1.86 milion euro për vitin 2023.

Të gjitha rajonet e Kosovës pritet të zhvillohen me 1.84 milionë euro për vitin 2023, rreth 2 milionë euro në viti 2024 dhe mbi 2 milionë euro në vitin 2025. Për kundër këtij buxheti, keni treguar një performacë të dobët në dy vitet e fundit, në vitin 2021 dhe 2022. Në vitin 2021 janë shpenzuar vetëm 35 milionë euro se në vitin 2020, e ky vit ka qenë vit pandemik. Sipas raportit për vitin 2022 për investimet kapitale janë shpenzuar vetëm 21 për qind dhe subvencione e transfere vetëm 29 për qind”, thekson ai.

“Dua t’iu tërheqë vëmendjen te neni 9 paragrafi 6 për buxhetin e komunave, ku Ministria e Financave po tenton të bëjë shkelje kushtetuese dhe të jetë në kundërshtim me Ligjin për Menaxhimin e Financave Publike”, përfundon Mustafa. /Telegrafi/