Muaji i kaluar ishte “qershori më i nxehtë i planetit” – me një diferencë të madhe

Temperatura e Tokës ishte jashtë shifrave normale muajin e kaluar pasi një valë ekstreme e nxehtësisë “dogji” SHBA-në jugore dhe Meksikën dhe ngrohtësia e oqeanit u rrit në nivele alarmante, tregon një raport i ri.

Sipas mediave të huaja, përcjell Telegrafi, analiza nga Shërbimi i Ndryshimeve Klimatike të Bashkimit Evropian Copernicus zbuloi se muaji i kaluar ishte qershori më i nxehtë i planetit me një “diferencë të konsiderueshme” mbi rekordin e mëparshëm, i cili u vendos në vitin 2019.

Nëntë qershorët më të nxehtë kanë ndodhur të gjithë në nëntë vitet e fundit, sipas agjencisë – dëshmi se kriza klimatike e shkaktuar nga njerëzit po i çon temperaturat në nivele të paprecedentë.

Copernicus zbuloi gjithashtu se temperaturat e sipërfaqes së oqeanit ishin më të ngrohtat e regjistruara për qershorin, të nxitura kryesisht nga ngrohtësia e jashtëzakonshme në Atlantikun e Veriut dhe nga fuqizimi i El Niño në Paqësor.

Ndërkohë bëhet e ditur se Evropa veriperëndimore përjetoi temperatura rekord të qershorit dhe pjesë të Kanadasë, Shteteve të Bashkuara, Azisë dhe Australisë lindore ishin shumë më të ngrohta se normalja.

Analiza erdhi pasi të dhënat nga agjencitë globale të klimës sugjeruan se planeti pa ditën e tij më të nxehtë të regjistruar në fillim të kësaj jave – fillimisht të hënën dhe më pas përsëri të martën.

“Kjo është alarmante”, tha për CNN, Jennifer Marlon, një shkencëtare klimatike në Shkollën e Mjedisit në Yale e cila nuk ishte e përfshirë në analizë.

“Është e vështirë të imagjinohet se si do të jenë verat për fëmijët dhe nipërit tanë në 20 vitet e ardhshme. Kjo është pikërisht ajo që duket ngrohja globale”. /Telegrafi/