MPJD: Operacioni i kërkimit në lumin Lepenc është duke u realizuar me disa vështirësi, pa epilog deri më tani

Ambasada e Kosovës në Maqedoninë e Veriut së bashku me MPJD-në, kanë dalë me një njoftim lidhur me aksidentin tragjik në aksin rrugor Bllacë-Shkup, ku një veturë me targa të Kosovës ka rënë në lumin Lepenec.

Në njoftimin e lëshuar nga MPJD, thuhet se në vendngjarje ka dalë edhe ministri i Brendshëm, Xhelal Sveçla.

“Dje, me datë 17 qershor 2023, në orët e pasdites, pas një aksidenti në komunikacion, një veturë me targa të Republikës së Kosovës ka humbur drejtimin dhe ka përfunduar në lumin Lepenc.

Në veturë ndodheshin katër pjesëtarë të një familjeje nga Kosova. Njëri prej tyre ka arritur që të dalë nga lumi Lepenc, përderisa të tjerët janë në kërkim. Në vendngjarje ka dalë ministri i Brendshëm, Xhelal Sveçla, bashkë me ambasadorin e Kosovës në Maqedoninë e Veriut, Florian Qehaja, të shoqëruar nga zëvendësministri i brendshëm i RMV Nazim Bushi”, thuhet në njoftim.

Lexo po ashtu Pacolli njoftoi që kanë humbur jetën tre qytetarët nga Kosova - vazhdojnë kërkimet në lumin Lepenc, merr pjesë edhe FSK

MPJD, përmes procedurave të përshpejtuara ka lehtësuar dhe koordinuar kalimin e njësiteve të specializuara të kërkim-shpëtimit nga Kosova për në territorin e RMV-së, pas kërkesës së autoriteteve maqedonase.

“Krahas ekipeve të specializuara të Maqedonisë së Veriut, që në orët e hershme të mëngjesit pjesë e operacionit të kërkim-shpëtimit janë njësiti relevant nga FSK dhe ai nga Policia e Kosovës. Për shkak të rreshjeve të shumta të ditëve të kaluara, operacioni është duke u realizuar me disa vështirësi por pa epilog deri më tani”, thuhet në njoftim.

MPJD ka shtuar do të mbajë të informuar opinionin rreth zhvillimeve të mëtejme. /Telegrafi/