MPB: Shtesa e shkurtit do të merret bashkë me pagën e muajit mars

Ministria e Financave dhe Ministria e Punëve të Brendshme njoftojnë të gjithë zyrtarët publikë se sot (martë) do të lëshohen pagat e para me ligjin e ri cili ka hyrë në fuqi me datën 5 shkurt 2023.

Megjithatë, Ministria e Brendshme njofton se shtesat e muajit shkurt për ata që u takojnë, do të paguhen në mars për shkak të vështirësive në mbledhjen e të dhënave.

“Komisionet për përcaktimin e shtesave të parapara me këtë ligj dhe aktet nënligjore që derivojnë prej tij, tashmë janë themeluar dhe janë duke mbledhur të dhënat nga institucionet përkatëse lidhur me zyrtarët që mund/do të përfitojnë këto shtesa, përfshirë këtu komisionet për shtesën për kushte specifike të punës, shtesën për kushte tregu dhe shtesën për ekspertët”.

“Përkundër punës intensive të komisioneve për përcaktim të shtesave, procesi i mbledhjes së të dhënave dhe finalizimit të listave është duke vazhduar, andaj njoftojmë të gjithë zyrtarët publikë se shtesat e sipërpërmendura për muajin shkurt do të paguhen në mënyrë retroaktive në pagën e muajit mars”, thuhet në njoftim.

Lexo po ashtu Dalin pagat me koeficient të ri, Jasharaj: Mësimdhënësit morën pagë 100 euro më të lartë

MPB thotë se me përfundimin e mbledhjes së të dhënave nga ana e komisioneve dhe finalizimit të listave me zyrtarët që do të përfitojnë këto shtesa, të njëjtët do të marrin bashkë me pagën dhe shtesën e muajit mars edhe shtesën përkatëse për muajin shkurt.

“Ftojmë të gjitha institucionet që të dërgojnë të dhënat e kërkuara nga komisionet përkatëse pa vonesë, në mënyrë që procesi të përmbyllet sa më parë”, thuhet tutje në njoftim./Telegrafi/