Një mjek nga Kalifornia, i akuzuar për dhënien e aksesit në ketaminë aktorit të njohur të serialit “Friends”, Matthew Perry, në javët para vdekjes së tij nga mbidoza, ka pranuar të deklarohet fajtor, sipas një njoftimi nga prokurorët federalë.
Dr. Salvador Plasencia do të pranojë fajësinë për katër akuza për shpërndarje të ketaminës, konfirmuan autoritetet të hënën.
Pranimi i fajësisë mund të rezultojë me një dënim maksimal prej 40 vitesh burg. Ai pritet të paraqesë vetëdeklarimin e tij në javët e ardhshme, shkruan BBC.
Matthew Perry – i njohur më së shumti për rolin e Chandler Bing në serialin ikonik “Friends” – u gjet i vdekur në tetor të vitit 2023 në vaskën e tij me ujë të nxehtë në shtëpinë e tij në Los Angeles. Aktori ishte 54 vjeç.
Edhe pse kishte folur hapur për betejat e tij me depresionin dhe varësinë, vdekja e tij tronditi fansat në mbarë botën.
Sipas mesazheve me tekst të dorëzuara prokurorëve nga Dr. Mark Chavez – një tjetër mjek i përfshirë në këtë çështje, i cili tashmë e ka pranuar fajësinë – Dr. Plasencia e kishte përshkruar Perry-n si një “idiot” dhe pyeste veten sa shumë do të ishte i gatshëm të paguante për medikamentet. /Telegrafi/
