Mjeku Enver Hoxha ekspozon krimet e luftës në Kosovë përmes fotografive

Ka mjaft dëshmi për krimet e kryera në Kosovë nga forcat serbe gjatë luftës së fundit. Ka fotografi të cilat pasqyrojnë qartë tmerrin që përjetuan shqiptarët në vitet 98-99. Disa prej tyre i ruan Enver Hoxha, që shërbeu si mjek gjatë luftës në Kosovë. Ai mjekoi ushtarë e civil. E një pjesë të këtyre materialeve ai do t’i paraqesë nëpërmjet një eksopozite të quajtur “Gjenocidi XX: Ta kujtojmë të kaluarën, të ndërtojmë të ardhmen”.

Meqë kanë kaluar dy dekada prej luftës së fundit në Kosovë, Enver Hoxha, i cili shërbeu si mjek në Zonën Operative të Llapit, në një intervistë për KosovaPress, këmbëngul që të mos harrohet gjenocidi serb i kryer në Kosovë.

Fotografitë të cilat janë realizuar në Shalë, Llap e Gollak, dëshmojnë krimet që janë bërë ndaj popullatës civile.

“Qëllimi i kësaj ekspozite është me pasqyru gjenocidin në Kosovë, i cili është bërë në një pjesë të Kosovës me një material i cili është i pabotuar. Në kuadër të 20 vjetorit të çlirimit e kam parë të arsyeshme që vlen të ritheksohet edhe në mendjen të gjeneratave, por edhe institucioneve si vendore, ashtu edhe ndërkombëtare me u marrë më seriozisht me shkaktarin e këtij gjenocidi, i cili në vazhdimësi ka qenë i pandëshkueshëm”, thotë ai.

Enver Hoxha këto materiale i ruan qe 20 vjet, ku janë shkrepur pamje që nga zhvendosja dhe dëbimi i shqiptarëve nga shtëpitë e tyre, djegia, e deri te masakrimi i popullatës.

Hoxha në këtë ekspozitë do të pasqyrojë vetëm materiale të gjenocidit në popullatën civile.

“Fatbardhësisht i kam ruajtur edhe koleksioni i fotografive i përmbledh në tri kaptina. Atë pjesën ushtarake, pjesën e pacientëve, spitalit ushtarak edhe pjesën e popullatës. Por, kësaj radhe do e pasqyroj vetëm atë pjesën e popullatës, konkretisht gjenocidin e popullit tonë që është bërë në kohën e atëhershme. Që realisht edhe pushtetarët e atëhershëm serb në media e kanë quajtur si qytetarë të ish-Jugosllavisë, e në terren të njëjtit qytetarë i kanë masakruar. Gjë që edhe sot Serbia e bën, e ka preambulë prapë Kosovën, por çdo gjë e bën që të na asgjësoj”, shton ai.

Në ekspozitën e cila do të hapet të martën në orën 16:00, janë të përmbledhura mbi 100 fotografi, të cilat pasqyrojnë gjendjen e atëhershme të Zonës së Llapit, ku Enver Hoxha aso kohe së bashku me shokët e tij kishin organizuar sistemin shëndetësor, duke trajtuar të plagosurit.

E meqë pasion e kishte fotografinë, ai kishte provuar që të bëjë një “dokumentar”, me qëllim që të ardhmen mos të harrohet historia e Kosovës.

Për këto materiale, Hoxhës iu kishin ofruar edhe të holla nga mediat dhe ambasadat.

“Fotografitë fillimisht i kam zhvilluar pas lufte, kam pasur kontakte sidomos me faktorët e jashtëm, me gazetarë dhe zyre të shteteve mike. Shumica më kanë afruar të holla që t’i shesim, normalisht që unë kam insistuar që të bëjë ekspozitën në vendet e perëndimit, ata më kanë ofruar mundësi vetëm që t’i shes. Unë e kam ditë rëndësinë që të hollat e kanë një vlerë, por në këtë raport nuk kanë kurrfarë vlere. Kjo është një histori e popullit tim, është bërë një pjesë përbërëse e trupit tim. Unë tash nuk kam mbërri që të shes pjesë të trupit”, tregon ai.

Hoxha thotë se nuk duhet të përbuzet e kaluara, e as ajo që kanë përjetuar popullata civile.

“Kjo tregon një realitet. Dy “XX”, pasqyrojnë 20 vjetorin, po e pasqyrojnë edhe shekullin e XX, që gjatë gjithë këtij shekulli ka pasur gjenocid mbi popullin shqiptarë. Edhe e treta është që jo dy “XX”, por edhe shumë të tjerë, që kurrë nuk u gjykua gjenocidi mbi popullin shqiptarë”, tregon ai.

Enver Hoxha, i cili edhe tani punon si mjek, të martën me 10 dhjetor do të hap dyert e Muzeut Historik, për të shfaqur materialet e tij, si dokumente të krimeve që u bën në Kosovë gjatë periudhës 98-99.

Ekspozita do të zgjas pesë ditë dhe do të jetë e hapur për të gjithë.

Fotografitë janë realizuar gjate vitit 1999.