Miratimi i Projektligjit për Rimëkëmbjen Ekonomike do t’ua mundësojë qytetarëve kontribut pagues të tërheqin 10 për qind të mjeteve nga llogaria e tyre në Fondin e Kursimeve Pensionale të Kosovës, përderisa krijon edhe favore për bizneset, thonë njohësit e çështjeve ekonomike. Sipas tyre, Kosova është vonuar me pakon e masave për sanimin e dëmeve nga pandemia.

Njohësit e çështjeve ekonomike, po e cilësojnë veprim të duhur votimin e ligjit për rimëkëmbjen ekonomike, për shkak të krizës ekonomike qe po kalon Kosova.

Kryetari i Odës Ekonomike, Berat Rukiqi, e ka cilësuar si të domosdoshëm votimin e projektligjit për rimëkëmbje ekonomike. Sipas tij qytetarët do të përfitojnë nga mjetet e Trustit, ndërkaq bizneset tek qasja e financave.

“Ligji për Rimëkëmbjen Ekonomike ka qenë i domosdoshëm që nga fillimi i pandemisë pasi që si në aspektin shëndetësorë ashtu edhe në aspektin ekonomike nuk kanë mundur të trajtohen për shkak të situatës së jashtëzakonshme…Qytetarët kryesisht e kanë orientimin te mjetet e Trustit, ndërsa bizneset te qasje në financa dhe lehtësirave tatimore që mund t’iu krijohen përmes këtij ligji”, deklaroi Berat Rukiqi.

Ndërsa Profesori i ndërmarrësisë nga RIT Kosova, Fadil Sahiti, thotë se ky nuk është ligj për rimëkëmbje ekonomike, por ligj për mbijetese ekonomike, që do shërbej si infuzion për ndërmarrjet.

“Lajm që do të duhej të pritet mirë, sidomos nga komuniteti i biznesit, ndërmarrësit që po ballafaqohen me shumë probleme të mëdha sot në Kosovë. Edhe pse nuk do ta quaja ligj për rimëkëmbje por ligj për mbijetesë ekonomike pasi që një numër i ndërmarrjeve të mëdha po ballafaqon me problemin e mbijetesës”, deklaroi Fadil Sahiti.

Ditë më parë Fondi Monetar Ndërkombëtar ka dal kundër tërheqjes së 10 përqindëshit nga Fondi Pensional i Kursimeve. Sipas tyre, tërheqja e këtyre parave, zvogëlon pensionet e ardhshme dhe kufizon madhësinë e tregut të brendshëm të kapitalit./RTV Dukagjini/Telegrafi/