Ministria e Shëndetësisë tregon se cilët qytetarë, që vijnë në Kosovë, duhet të bëjnë testin për Covid-19

Ministria e Shëndetësisë përmes një komunikate ka hedhur poshtë, siç thuhet, dezinformatat qëllimkëqija të individëve të papërgjegjshëm që për protagonizëm vikendi dezinformojnë qytetarët lidhur me masat anti-Covid, në veçanti mërgimtarët tanë që këtyre ditëve kthehen për pushime në Kosovë.

Ministria e Shëndetësiës (MSh) sqaron se asnjë qytetar që kthehet nga vendet e tjera në Kosovë dhe që ka vendbanim në Kosovë nuk ka nevojë që me rastin e hyrjes në vendin tonë të këtë PCR test negativ.

“Ky test u kërkohet atyre që nuk kanë vendbanim në Kosovë dhe të cilët vijnë nga vendet e ranguara me rrezik të lartë’, sipas klasifikimit që bën Qendra Evropiane për Parandalimin dhe Kontrollin e Sëmundjes (ECDC)”, thuhet në njoftimin e MSH, përcjell Telegrafi.

Më tej në njoftim thuhet se “asnjë qytetar i Kosovës që vjen në Kosovë, me apo pa PCR test, nuk i nënshtrohet kurrfarë karantine apo izolimi 14 ditor, siç dezinfomohet. Ata që vijnë në Kosovë nga shtetet e klasifikuara me rrezik të lartë dhe që nuk kanë vendbanim në Kosovë, duhet të qëndrojnë për shtatët ditë në shtëpi (vetizolim) si masë parandalimi kundër përhapjes së virusit”.

Lexo po ashtu Miftaraj: Qeveria e Kosovës po i detyron mërgimtarët ta bëjnë testin e COVID-19, brenda ditës do të mblidhen 780 mijë euro

“Është shpifje e ulët, gjithashtu, të thuhet se qytetarët të cilët vijnë në Kosovë detyrohen të testohen këtu, aq më tepër në laboratore private”.

Ministria e Shëndetësisë thotë se qytetarët të cilët nuk kanë vendbanim në Kosovë me rastin e hyrjes në Kosovë, e kanë testin e bërë në vendin prej nga vijnë, ndërsa ata që nuk e kanë këtë vetizolohen për shtatë ditë si masë kujdesi dhe në rast se manifestojnë shenja të pranisë së virusit, e kanë mundësinë që, sipas indikacioneve mjekësore të testohen në institucione publike, sikurse çdo qytetar tjetër i Republikës së Kosovës.

“Me qëllim të shmangies së dezinformatave, MSh u bën thirrje qytetarëve që të informohen nga burimet zyrtare si Ministria e Shëndetësisë, Ministria e Punëve të Jashtme dhe e Diasporës, Ministria e Punëve të Brendshme, ambasadat tona në vendet prej nga vijnë ata dhe shërbimet e tjera institucionale lidhur me masat në fuqi që kanë të bëjnë me COVID-19 dhe të injorojnë dezinformatat që vijnë nga individë të papërgjegjshëm dhe që nuk janë të vetëdijshëm për dëmin që ua bëjnë pikërisht mërgimtarëve, duke i dezinformuar me qëllim apo nga mosdija”, thuhet në komunikatë. /Telegrafi/