Milani i gatshëm të ‘sakrifikojë’ njërin prej dy yjeve të ekipit për të financuar blerjen e Joao Felix

Milani po planifikon një strategji për të siguruar transferimin e përhershëm të Joao Felix nga Chelsea gjatë verës, në një lëvizje e cila do të përfshinte shitjen e të paktën njërit prej yjeve kryesor të ekipit. 

‘Rossonerët’ e transferuan Felix si huazim në ditën e fundit të afatit kalimtar të janarit, por kimia e menjëhershme mes lojtarit dhe klubit, ka bërë që Milani të konsiderojë mundësinë që ta mbajë 25-vjeçarin përtej këtij sezoni. 

Drejtuesit e klubit italian janë në dijeni se Chelsea do t’i komplikojë negociatat për shkak të kërkesave të tyre të larta, por Gazzetta dello Sport ka raportuar se lëvizja e parë do të ishte që të zgjatej rinovimi i Felix edhe për një sezon. 

Por, kjo do të bëhej duke përfshirë gjithashtu edhe opsionin e obligimit të blerjes së kartonit për 40 milionë euro. 

Lexo po ashtu Joao Felix konfirmon se refuzoi gjigantin evropian për t’u transferuar tek Milani

Kjo do t’i dhuronte kohë Milanit që të sigurojnë fondet e nevojshme për blerjen e Felix, një proces i cili do të bëhej më i lehtë nëse vendosin ta shesin njërin prej Theo Hernandez ose Rafael Leao. 

GdS tutje shpjegon se që të dy lojtarët janë nën vëzhgimin e klubit sa i përket perfromancave të tyre, me reprezentuesin francez që është i përfshirë në negociata për rinovimin e kontratës. 

Gjiganti italian do të ishte i hapur për ta lejuar largimin e të dyve në rast se arrijnë ofertë të përshtatshme, kjo pasi do të kishin përfituar para të mjaftueshme për të financuar blerjen e Felix, por edhe të transferimeve të tjera./Telegrafi/