Mendimi paralajmëron shi dhe borë të enjten – temperaturat në rënie

Të enjten, në Kosovë pritet të ketë reshje shiu dhe bore që do të nisin nga orët e para të mëngjesit dhe pritet të jenë herë pas here më të intensifikuara.

Në zonat më të larta, reshjet do të përbëhen kryesisht nga bora.

Pasdite, pritet që reshjet të pushojnë në disa zona, veçanërisht nga perëndimi dhe veriu.

Temperaturat minimale do të luhaten mes 2°C dhe 3°C, ndërsa ato maksimale në rrafshin e Kosovës do të mbeten rreth 3°C, dhe në Dukagjin do të arrijnë deri në 6°C apo 7°C.

Do të fryjë një erë e ftohtë veriore dhe verilindore, me intensitet të lehtë deri mesatar prej 4-9 m/s.

Të premten, moti do të vazhdojë të jetë i ftohtë dhe kryesisht i vranët, me mundësi të ndonjë rrebeshi të lehtë bore.

Temperaturat maksimale pritet të jenë mes 3°C dhe 5°C.

Të shtunën, vranësirat do të shpërndahen gradualisht, ndërsa të dielën pritet më shumë diell dhe temperaturat do të rriten, duke arritur deri në 10°C dhe 12°C.

Temperaturat minimale mund të zbresin deri në -2°C apo 0°C, ndërsa erërat verilindore do të mbeten me intensitet të lehtë deri mesatar prej 4-9 m/s.

Nesër, reshjet do të ndihmojnë në shpërndarjen e ndotësve ajror, duke e mbajtur indeksin e cilësisë së ajrit në vlera të pranueshme.

Ndërsa nga e premtja në mbrëmje, me qetësimin e erërave, ndotësit do të qëndrojnë më afër sipërfaqes, duke bërë që indeksi të kalojë në vlera të dobëta.

E shtuna mund të shënojë indekse të dobëta gjatë ditës, herë pas here duke kaluar edhe në shumë të dobëta, raporton Mendimi për Motin, transmeton Telegrafi.