Mehmeti e quan veprim të pamatur Asociacionin e Komunave Shqiptare në Preshevë

Xhelal Mehmeti, bartës i listës së këshilltarëve nga Partia për Veprim Demokratik në Preshevë, në një intervistë për emisionin “Interaktiv” të KTV-së ka thënë se iniciativa për krijimin e Asociacionit të Komunave Shqiptare në Luginën e Preshevës ishte veprim i pamatur dhe krye në vete.

Mehmeti ka thënë se udhëheqësit politikë shqiptarë në Preshevë e morën vendimin për themelimin e Asociacionit pa u konsultuar me Prishtinën dhe Tiranën.

“Ishte hap total i pamatur, morën vendim krye në vetin. Ftuan gjitha partitë në konsultim dhe pastaj e kemi parë se kjo nuk ishte aspak serioze. Nuk janë konsultuar as me Prishtinën, as me Tiranën as me BE-në”, ka thënë Mehmeti.

Derisa ka folur për Asociacionin e Komunave Shqiptare, Mehmeti ka thënë se shqiptarët në Luginë kanë humbur shumë kohë duke kërkuar bashkimin me Kosovën dhe me Shqipërinë.

“Ne në Preshevë jemi në gjendje katastrofale. Njerëzit ikin për Evropë. Nuk është në kompetencat tona për një hap kaq madhor”, ka theksuar ai.

“Nëse vjen deri te ndryshimi i kufijve ose bashkimi kombëtar, mos të merremi me fjalë, por ta zhvillojmë komunën, t’i zhvillojmë institucionet tona. Në komunë ka mbetur vetëm një bankë sepse nuk ka zhvillim ekonomik”, ka shtuar anëtari i PVD-së.

Mehmeti ka thënë se institucionet arsimore në Kosovë gabuan kur dërguan librat për shkollat shqiptare në Luginën e Preshevës. Ai ka përmendur logot kosovare nëpër libra si problemin kryesor e bllokimit të tyre.

“Më e pranueshme do të ishin nëse librat do të vinin nga Shqipëria. Në një formë të koordinuara nëse kërkesa për dërgimin e librave të bëhej në ambasadën shqiptare në Beograd”, ka thënë veç të tjerash Mehmeti.