“Mbështetja e garantuar e Amerikës për Evropën ka mbaruar”, paralajmëron Zelensky

Presidenti i Ukrainës ka paralajmëruar se ditët e mbështetjes së garantuar të SHBA-së për Evropën kanë mbaruar, pasi ai i kërkoi kontinentit të bashkohet për të krijuar një ushtri dhe politikë të jashtme.

“Disa ditë më parë, presidenti Trump më tregoi për bisedën e tij me Putinin. As një herë ai nuk përmendi se Amerika ka nevojë për Evropën në atë tryezë. Kjo thotë shumë”, tha Zelensky në një fjalim të fortë në Konferencën e Sigurisë në Mynih.

“Kohët e vjetra kanë mbaruar – kur Amerika e mbështeti Evropën vetëm sepse e kishte mbështetur gjithmonë”, shtoi ai.

Bëhet e ditur se Zelensky pranoi se ai “nuk ishte i lumtur” që telefonata e parë e Trump ishte me Putinin, shkruan CNN, përcjell Telegrafi.

Udhëheqësi ukrainas paralajmëroi se do të ishte edhe “më e rrezikshme” megjithatë nëse Trump takohet me presidentin rus përpara tij.

“Dje këtu në Mynih, zëvendëspresidenti amerikan e bëri të qartë se dekada të marrëdhënieve të vjetra mes Evropës dhe Amerikës po marrin fund. Tani e tutje, gjërat do të jenë ndryshe dhe Evropa duhet të përshtatet me këtë”, tha Zelensky.

Presidenti ukrainas bëri thirrje gjithashtu për një ushtri të bashkuar evropiane, pasi ai pranoi se Shtetet e Bashkuara mund të mos vazhdojnë të ofrojnë mbështetje ushtarake si dikur.

“Le të jemi të sinqertë – tani nuk mund të përjashtojmë mundësinë që Amerika t’i thotë ‘Jo’ Evropës për çështje që e kërcënojnë atë. Shumë liderë kanë folur për Evropën që ka nevojë për ushtrinë e saj – një ushtri të Evropës”, deklaroi lideri ukrainas.

Më vonë në fjalimin e tij, Zelensky akuzoi Putinin se synon të “gdhendë botën” përmes bisedimeve kokë më kokë me Trumpin.

Në një shkëmbim që nxiti të qeshura nga turma, Zelensky gjithashtu pranoi se i kishte thënë Trumpit se Putini kishte frikë prej tij.

Ndryshe, pas fjalimit të Zelenskyt, kryeministri polak Donald Tusk tha se Evropës “i duhet urgjentisht një plan veprimi” në lidhje me Ukrainën, ose rrezikon që lojtarët e tjerë globalë të vendosin për të ardhmen e saj. /Telegrafi/