Marrëveshja e fshehtë që mund ta lejojë Sanchon të largohet nga Dortmundi

Jadon Sancho është njëri nga lojtarët më të kërkuar në tregun e transferimeve.

Futbollisti i talentuar anglez prej tri vitesh është pjesë e klubit gjerman ku ka shkëlqyer si në kampionat ashtu edhe në garat evropiane.

Chelsea, Manchester United, Liverpool, Barcelona e Paris Saint Germain janë skuadrat e interesuara për të.

Por Dortmundi po heziton ta lejoj largimin e lojtarit pa u paguar shuma prej 130 milionë eurove.

Ka qenë e përditshmja gjermane Sport Bild që ka zbuluar një marrëveshje të fshehtës mes lojtarit dhe drejtuesve të klubit në momentin e rinovimit të kontratës.

Ishte tetori i vitit 2018 kur Sancho rinovoi kontratën deri në vitin 2022, ndërsa aty ka bërë një marrëveshje me drejtuesit e klubit që në momentin që lojtari kërkon largimin të lejohet për një çmim që është real.

Kjo marrëveshje nuk është e shkruar askund dhe anglezi tani pret që drejtuesit ta mbajnë fjalën.

20-vjeçari ka kërkuar largimin pasi dëshira e tij e madhe është të rikthehet në vendlindje pas tri viteve të kaluara në Gjermani.

Dortmund i ka ofruar rinovimin e kontratës duke e bërë atë lojtarin e dytë më të paguar në klub me 10 milionë euro në sezon, por Sancho dëshiron vetëm largimin.

Sipas asaj që raporton Sport Bild, Dortmund do ta lejoj tani largimin e lojtarit pasi nuk dëshiron ta prish marrëveshjen me të.

Megjithatë verdhezinjtë nuk do të pranojnë në asnjë mënyrë oferta nën 130 milionë euro, pasi sipas tyre Sancho vlen edhe më shumë dhe ky është çmimi i fundit që mund të pranojnë për të.

E përditshmja gjermane raportoi se nëse nuk do të ishte kjo marrëveshje, atëherë Dortmund do të mbanin edhe për një tjetër sezon yllin anglez në Signal Iduna Park. /Telegrafi/