Mandl: Dialogu është në ngërç, Vuçiq ka shmangur marrëveshjen, ka luajtur shumë lojëra me akterët evropianë

Eurodeputeti austriak Lukas Mandl, në një intervistë për Telegrafin, ka folur për gjendjen aktuale të dialogut mes Kosovës dhe Serbisë, duke theksuar se ky proces është bllokuar dhe ka nevojë për një qasje të re.

Mandl tha se Serbia ka humbur mundësi të rëndësishme për zhvillim ekonomik dhe integrim evropian për shkak të qëndrimit të saj të ngurtë ndaj Kosovës.

“Po, dialogu është në një ngërç. Shumë njerëz në Serbi duan një të ardhme të mirë, por qeveria serbe e ka marrë popullin e saj peng për një kohë të gjatë me këtë çështje,” tha Mandl.

Ai shtoi se Serbia mund të kishte qenë shumë më e avancuar në zhvillimin e saj ekonomik dhe në integrimin evropian nëse nuk do të ishte kaq e fiksuar pas çështjes së Kosovës.

“Qeveria serbe ka luajtur shumë lojëra me Kosovën, me Bashkimin Evropian dhe me botën e jashtme. Ata kanë shmangur përmbushjen e marrëveshjeve që kanë nënshkruar,” u shpreh Mandl.

Ai kujtoi deklaratën e fundit të ish-Përfaqësuesit të Posaçëm të BE-së, i cili tha se Marrëveshja e Ohrit do të kishte qenë një sukses.

“Kjo tregon shumë, sepse Marrëveshja e Ohrit nuk është zbatuar. Ky shembull tregon se çfarë ka shkuar keq edhe në një nivel më të gjerë,” tha Mandl.

Duke shprehur optimizëm, Mandl tha se ka besim tek Përfaqësuesi i ri i Posaçëm i BE-së, Peter Sørensen.

“BE-ja ka ndalur praktikën paradoksale të caktimit të zyrtarëve nga shtetet anëtare që ende nuk e njohin Republikën e Kosovës për çështje që lidhen me Kosovën. Edhe nëse një zyrtar i tillë do të përpiqej të vepronte si ndërmjetës i ndershëm, ai do të kishte një barrë të rëndë mbi supe – mungesën e besimit,” shpjegoi Mandl.

Ai e quajti emërimin e Sørensenit, si “një hap i mirë përpara.”

Mandl theksoi se për të zhbllokuar dialogun, është e nevojshme që të dyja palët të tregojnë fleksibilitet dhe të fokusohen në zbatimin e marrëveshjeve ekzistuese.

Ai vuri në dukje se Bashkimi Evropian duhet të luajë një rol më aktiv dhe të sigurojë që të dyja palët të respektojnë detyrimet e tyre.

Mandl theksoi se paqja dhe stabiliteti në rajon janë të rëndësishme jo vetëm për Kosovën dhe Serbinë, por edhe për të gjithë Evropën.

“Është koha për të ndërprerë lojërat dhe për të punuar drejt një zgjidhjeje të qëndrueshme,”  deklaroi Mandl.

Fondet e BE-së për Ballkanin Perëndimor kushtëzohen me përparim në dialog

Bashkimi Evropian ka ndarë një buxhet prej 6 miliardë eurosh për Planin e Rritjes, ku Kosovës i takojnë mbi 820 milionë euro.

Këto fonde, të cilat përfshijnë ndihmë financiare pa kthim dhe kredi të favorshme, nuk do të jenë të aksesueshme pa përmbushjen e disa kushteve të rëndësishme.

Sipas BE-së, përveç reformave të brendshme, Kosova dhe Serbia duhet të demonstrojnë përparim konkret dhe të matshëm në normalizimin e marrëdhënieve mes tyre.

“Serbia dhe Kosova duhet të angazhohen në mënyrë konstruktive dhe të arrijnë rezultate të prekshme në normalizimin e marrëdhënieve për të qenë të pranueshme për financim në kuadër të Planeve të Rritjes. Zbatimi i Agjendës së Reformave duhet të kontribuojë në mekanizmat ekzistues për lehtësimin e Dialogut”, deklaroi një zëdhënës i BE-së.

Nga ana e saj, Zyra e Zëvendëskryeministrit Besnik Bislimi nuk ka pranuar të komentojë mbi këtë qëndrim të BE-së.

Kosova dhe Serbia dialogojnë në Bruksel qysh prej vitit 2011./Telegrafi/