Një situatë e pazakontë ndodhi të hënën në Nju Jork, kur presidenti francez Emmanuel Macron mbeti i bllokuar nga autokolona që shoqëronte presidentin amerikan Donald Trump.
Siç pretendohet në përshkrimin e pamjeve, rrugët u mbyllën për sigurinë e presidentit amerikan, duke ndalur edhe presidentin Macron, përcjell Telegrafi.
Një polic i kërkoi ndjesë duke thënë: “Më vjen keq, zoti President, gjithçka është e bllokuar tani”.
Pas kësaj, presidenti francez thuhet se e telefonoi presidentin amerikan dhe me shaka i kërkoi atij të “lironte rrugën”.
Macron, i qetë dhe me një buzëqeshje të lehtë, takoi kalimtarët që shfrytëzuan momentin për fotografi me të.
Pamjet u shpërndanë gjerësisht në rrjetet sociale, duke e kthyer këtë episod të shkurtër në një skenë të rrallë ku diplomacia u përplas me trafikun e Manhattan-it. /Telegrafi/
