Lushtaku: Nuk kam pritur që në partinë e Albin Kurtit të jenë një pjesë e udbashëve

Sami Lushtaku në emisionin “Personale” në RTV Dukagjini ka komentuar profilet e disa personaliteteve kryesore politike në Kosovë.

Presidentin Thaçi, ai e ka konsideruar politikanin më të duhur të vendit.

“E respektoj Thaçin, e çmoj, e kam mik, nuk e di ai sa më ka mik por është politikan i aftë”, tha ai.

I pyetur se kush është më i mirë si politikan, Thaçi apo Veseli, Lushtaku thotë se të dy janë të mirë por Thaçi është politikan më i mirë.

“Edhe Kadri Veseli është një prej liderëve të mirë të Kosovës”, shprehet Lushtaku.

Për Ramush Haradinajn ai ka thënë se respekton dhe e çmon rolin e tij në luftë por thotë se ka dilema për rolin në politikë.

Duke folur për kryeministrin në detyrë, Albin Kurti, Lushtaku tregon se ai e ka vizituar pasi kishte dalë nga burgu në vitin 2004.

Ish-komandanti i Zonës Operative të Drenicës është shprehur se ka pasur respekt për Kurtin si lider i Lëvizjes Vetëvendosje, por sipas tij gjërat kanë ndryshuar kur “Kurti është bërë strehë e njerëzve si Shkelzen Gashi”.

“Nuk kam pritur që njerëzit e Albin Kurtit të shajnë UÇK-në dhe të tentojnë ta kriminalizojnë UÇK-në. Nuk kam pritur që brenda subjektit të tij politik të jenë një pjesë e udbashëve dhe e njerëzve që urrejnë UÇK-në, sepse unë mendoj se duke urryer UÇK-në urrejnë edhe Kosovën”, deklaron ai.

Lushtaku thotë se flamurin e lëshoi Vetëvendosje dhe vet Albin Kurti./Telegrafi/