Lulzim Peci: Pas masakrës në Prekaz, Rugova kishte refuzuar ftesën e presidentit Chirac që ta vizitonte Francën

Ish-ambasadori i Kosovës në Suedi, Lulzim Peci, ka treguar se si pas masakrës në Prekaz ndaj familjes Jashari, presidenti Ibrahim Rugova e kishte refuzuar ftesën e presidentit francez, Jacques Chirac, për ta vizituar Francën.

Chirac ishte ftuar nga Rugova që të vinte në Kosovë për ta parë atë që po ndodhte.

“Si sot me kujtohet kur pas masakrës ne Prekaz, presidenti Shirak e ftoi presidentin Rugova të shkojë në vizitë në Paris, por ai nuk pranoi, dhe e ftoi në vizitë në Kosovë, Shirakun që ta shohë me sytë e tij se çfarë është duke ndodhur në vendin tonë! Lavdi themeltarëve të shtetit të Kosovës që ikën nga kjo botë, para se të jetësohet pavarësia e vendit tonë!”, ka shkruar Peci në Facebook.

Lexo po ashtu ​Jashari: Luftën që fituam me gjak nuk guxojmë ta humbim sot në tavolinë

Këtë të diel janë bërë 25 vjet që nga rrethimi i familjes së Jasharëve, në Prekaz të Drenicës.

Në 25-vjetorin e rënies heroike të komandantit legjendar Adem Jashari, familjes Jashari, dëshmorëve të kombit, si dhe të gjithë të rënëve për liri, Qeveria e Kosovës më 5, 6 dhe 7 mars do të organizojë manifestimin gjithëpopullor “Epopeja e Ushtrisë Çlirimtare të Kosovës”.

Sulmin e gjerë për të zhdukur Ushtrinë Çlirimtare të Kosovës, Serbia e kishte koncentruar në Prekaz, duke i bërë asaj një rrethim të hekurt./Telegrafi/