Lloga: Propozuam ligjin për masa restriktive, forcat politike që sot janë në pushtet e bllokuan

Ish-ministri i Drejtësisë, Krenar Lloga përmes një reagimi në faqen e tij në Facebook shkruan se vendosja e individëve në listën e zezë nga Departamenti Amerikan i Shtetit dëshmon se janë të përkushtuar për ndërtimin e institucioneve të qëndrueshme dhe një shteti me vlera demokratike dhe shtoi se, qeveria e kaluar propozoi ligj për masa restriktive ndaj personave të sanksionuar nga SHBA që siç thotë Lloga, ky ligj u bllokua në Kuvend nga forcat politike që sot janë në pushtet.

Lloga tha se, lufta kundër krimit dhe korrupsionit vazhdon të jetë selektive, ndërkohë që përmendi figura politike ku tha se, vijojnë të përfitojnë nga fondet publike pa asnjë hetim të hapur ndaj tyre.

“Shtetet e Bashkuara të Amerikës mbeten partneri ynë strategjik më i rëndësishëm për forcimin e sundimit të ligjit dhe luftën kundër korrupsionit në Maqedoninë e Veriut. Vendosja e individëve në listën e zezë nga Departamenti Amerikan i Shtetit dëshmon përkushtimin e tyre për ndërtimin e institucioneve të qëndrueshme dhe një shteti me vlera demokratike – një qëllim që e ndajmë të gjithë si qytetarë të këtij vendi.

Megjithatë, përkundër polemikave rreth emrave të përfshirë në këtë listë – që shpesh përfaqësojnë figura me ndikim dhe pushtet politik por edhe ekonomik – qeveria e kaluar pati guximin politik të propozojë një ligj për masa restriktive, që ndalonte aktivitetet politike dhe ekonomike të individëve të sanksionuar nga SHBA.

Fatkeqësisht, ky ligj u bllokua në Kuvend nga forcat politike që sot janë në pushtet, duke treguar një qasje të motivuar nga interesa personale dhe duke u frikësuar nga humbja e sponsorëve të tyre – një frikë që u reflektua edhe në rezultatin zgjedhor.

Në ndërkohë, lufta kundër korrupsionit dhe krimit të organizuar vijon të jetë selektive dhe fragmentare. Disa figura të njohura, si ish-zv.kryeministri Koço Angjushev dhe oligarku Kamçev, vijojnë të përfitojnë nga fondet publike pa asnjë hetim të hapur ndaj tyre. Njësoj, nuk ka asnjë veprim ligjor ndaj Jakimovskit, kryetarit të Karposhit, i cili vazhdimisht shfrytëzon platforma mediatike për ligjërata politike.

Një qasje e tillë selektive e drejtësisë jo vetëm që minon besimin e qytetarëve në institucione, por cënon edhe themelet e shtetit ligjor.

Drejtësia duhet të jetë e barabartë, gjithëpërfshirëse dhe e paanshme. Nuk mund të tolerohen standarde të dyfishta ku individët trajtohen ndryshe bazuar në përkatësinë etnike apo lidhjet politike. Ky diskriminim jo vetëm që dëmton sundimin e ligjit, por rrezikon edhe partneritetin me aleatët tanë ndërkombëtarë.

Apeloj fuqimisht që institucionet tona të tregojnë përgjegjësi dhe profesionalizëm, duke siguruar një trajtim të barabartë dhe transparent ndaj të gjithë individëve të përmendur në listën amerikane. Vetëm përmes drejtësisë së drejtë dhe të paanshme mund të rikthejmë besimin e qytetarëve në institucione dhe të forcojmë marrëdhëniet me partnerët ndërkombëtarë”, tha Lloga.