LK: Heronjtë dhe të dështuarit e rrethit kthyes gjysmëfinal

Ashtu siç është pritur ashtu dhe ndodhi. Në fakt, gjysmëfinalet kthyese të Ligës së Kampionëve ishin të mbushura plot taktikë dhe mbrojtje të fuqishme të cilat u gërshetuan nga individë të mëdhenj të futbollit, të cilët pothuajse u heshtën plotësisht.

Lyoni u bë pre e kthetrave të fuqishme të shpendit të quajtur ‘Ivica Olic’ i cili plot tri herë qëlloi saktë portën e Hugo Lloris, për të siguruar kualifikimin e gjermanëve dhe deklasimin e francezëve krenarë me të arriturat.

98.000 shikues ishin dëshmitarë të një qëndrese heroike të ushtrisë me në krye komandantin legjendar Jose Mourinho, në fushëbetejën epike të Camp Nou. Interi u mbajt për mrekulli në Camp Nou, madje edhe me dhjetë lojtarë, pas përjashtimit të Thiago Mottas. Edhe pse u mposht, Interi tregoi se meritonte finalen falë një përkushtimi, sakrifice dhe vetëmohimi duke bërë të heshtet ‘jashtëtokësori’ Messi dhe kolegu i tij, akademiku i kreacionit në mesfushë, Xavi Hernandez, të cilët dështuan të krijojnë aksione të rrjedhshme dhe koncize.

Heronjtë

Ivica Olic (Bayern Munich)

Nuk është e rastësishme. Kroati i nënvlerësuar arriti që në mënyrë dredhake të dënojë klubin francez, duke shënuar një het-trik bravuroz, për të qenë në garë me Lionel Messin për golashënuesin më të mirë, i cili do ta shikojë finalen nga televizori. Goli i parë i Olic ia hapi rrugën atij edhe për dy golat tjerë, duke kompletuar finalen pas fitores me rezultat të përgjithshëm prej 4-0 ndaj francezëve të Lyon.

Lucio + Walter Samuel (Inter)

Javier Zanetti ishte njeriu që në ndeshjen e parë neutralizoi totalisht Lionel Messin, por në ndeshjen kthyese, ishin i ‘çelikti’ Lucio me në krye bashkëpunëtorin e tij Samuel, ata që ia treguan vendin sulmit të Barcelonës. Ndaluan harkimet nga ajri, ndaluan pasimet brenda zonës, ndaluan depërtimet dhe zhdukën Ibrahimovicin, tek i cili kthehemi në anën tjetër të medaljes.

Gerard Pique (Barcelona)

Njeriu i vetëm që arriti të ‘hakojë’ kodin sekret Lucio-Samuel ishte Pique. Pasi arriti të ndalë topin në pasimin e parë të Xavit që depërtoi në mbrojtjen e Interit, ai me një rrotullim shënoi në portën e Julio Cesar, i cili ishte i pafuqishëm të ndalë këtë gol mjeshtëror të Piques. Vlen të përmendet që Pique ishte i jashtëzakonshëm në mbrojtje duke ndalur kundërsulmet e rralla të Interit dhe duke vënë përpara topin për të sulmuar.

Esteban Cambiasso (Inter)

Vendimtar në ndalimin e Lionel Messit dhe Xavit. Natyrisht, nëse ndalen mushkëritë dhe truri (Xavi), automatikisht ndalet edhe zemra (Messi). Ishte i pandalshëm dhe njeriu që kreu me përpikëri detyrat e tij ofensive.

Të dështuarit

Cris (Lyon)

Kapiteni dhe njëkohësisht shtylla e mbrojtjes së Lyonit nuk u vërejt, sidomos në golin e parë të Bayernit. Pas dërgimit të tij në zhveshtore, Lyon medoemos është dashur të sulmojë dhe duke parë zbrazëtirën në mbrojtje, Olic shënoi dhe dy herë të tjera.

Thiago Motta (Inter)

Fytyra tragjike e takimit. Mori dy kartonë të verdhë, të dytin në mënyrë kontroverse duke goditur në fytyrë Sergio Busquetsin, duke e lënë skuadrën e tij në pjesën më të madhe të lojës të vuante me dhjetë lojtarë.

Gabi vs Diego Milito

Shumë është folur për rivalitetin mes vëllezërve në fushën e Camp Nou, ndërsa asnjëri prej tyre nuk arriti të vë shenjën e tij në këtë takim vendimtar. Madje, ata nuk patën as një kontakt të vetëm në 45 minutat e para, përveç përshëndetjes solemne para takimit.

Zlatan Ibrahimovic (Barcelona)

Ibra kishte dy zgjidhje, ose të ishte hero ose të ishte një zero e madhe. Fatkeqësisht ishte kjo e dyta. Ai qëndroi 63 minuta në lojë, nuk u vërejt fare dhe gjëja e vetme që bëri ai është goditja e lirë, që edhe ashtu përfundoi në tribuna. Ibrahimovic shikoi në fund të sfidës ish-bashkëlojtarët e tij duke festuar për finalen e madhe. Se Massimo Moratti është mjeshtër i biznesit e vërtetoi Ibra. Nga largimi i Ibras, Moratti ndërtoi ekipin e dëshiruar nga Mourinho dhe absolutisht që suksesi nuk mungoi.

/Telegrafi/