Liverpooli përfshihet në garën për transferimin e Shaqirit

Liverpooli është përfshirë në listën e klubeve nga Liga Premier që i kërkojnë shërbimet e Xherdan Shaqirit.

Pas rënies së Stoke Cityt nga elita e futbollit anglez, mesfushori shqiptar pritet ta vazhdojë karrierën diku tjetër.

Lojtari që e përfaqëson Zvicrën ka një klauzolë në kontratën e tij që besohet të jetë ndërmjet 12 dhe 13.5 milionë funte (13.67 dhe 15.38 milionë euro) që mund të aktivizohet pasi klubi e ka humbur statusin e të qenit në Ligën Premier.

https://www.instagram.com/p/BjsZs8yAldr

Shaqiri, i cili kaloi te Stoke në vitin 2015 nga Interi për 12 milionë funte (13.67 milionë euro), e ka bërë të qartë se nuk e ka në plan të luajë në ligën Championship, mirëpo do t’i pëlqente të qëndrojë në Angli.

Lexo po ashtu Të gjitha lajmet për Xherdan Shaqirin

Deri më tani, Tottenham Hotspuri dhe Southamptoni kanë shprehur interesim për 26-vjeçarin, i cili tash është përfshirë edhe në listën e dëshirave të Liverpoolit.

Jurgen Klopp është i interesuar që t’i përforcojë disa pika kyçe në skuadër, mirëpo nuk dihet nëse Redsat mund ta aktivizojnë klauzolën e tij.

Liverpooli ishte shumë pranë transferimit të Shaqirit nga Bayern Munichu në vitin 2014, por asokohe lojtari vendosi të shkonte në Itali.

Ndërsa më vonë, mesfushori ka rrëfyer se bavarezët e kishin bllokuar transferimin e tij në Anfield dhe meqenëse nuk kishte minutazhin e duhur nën Pep Guardiolan, ai vendosi të shkonte te Interi. /Telegrafi/