Lista Serbe kërcënon me kryengritje nëse nuk lirohet serbi i arrestuar për sulm mbi policinë dhe djegie të veturave në veri

Lista Serbe (SL) ka paralajmëruar sonte se nëse autoritetet e Prishtinës nuk e lirojnë serbin e arrestuar, të dyshuar për sulm të armatosur ndaj njësisë së Policisë së Kosovës dhe djegien e veturës në veri të Kosovës do të shkaktojnë reagimin e të gjithë serbëve.

Pas këtij reagimi të Listës Serbe, siç raporton “N1”, dhjetëra qytetarë serbë janë grumbulluar në shenjë proteste për arrestimin e serbit të dyshuar për sulm ndaj policisë dhe djegie të veturave.

“Pas mbledhjes së informacioneve për rrëmbimin e sotëm të serbëve nga forcat speciale të Kurtit, theksojmë se populli serb po paralajmëron Prishtinën që nëse nuk e liron të arrestuarin padrejtësisht që u rrëmbye sot nga njësitet e Kurtit në veri të ‘Kosovës dhe Metohisë’ dhe të mos ndaloni së ngacmuari popullin serb, do të provokojnë reagimin e të gjithë serbëve”, thuhet në komunikatën e Listës Serbe.

Me tej në komunikatë thuhet se “nuk do të jetë një paralajmërim, por një kryengritje e përgjithshme për të ndaluar represionin e Albin Kurtit ndaj qytetarëve të pafajshëm”.

Policia e Kosovës ka njoftuar sot se ka arrestuar një serb M.B., i cili dyshohet se i ka vënë flakën veturës me tabela RKS në zonën e Zubin Potokut dhe për krime të tjera, përfshirë sulmin ndaj policisë.

Ministri i Brendshëm i Kosovës, Xhelal Sveçla, ka shkruar në llogarinë e tij në Facebook se i arrestuari ka qenë “pjesë aktive e strukturës kriminale të të ashtuquajturës ‘Mbrojtja civile’, më parë ai kishte sulmuar Policinë e Kosovës, duke i plagosur dy zyrtarë të saj”.

Ai po ashtu ka vlerësuar se pas djegies së veturave në veri qëndron Beogradi, me qëllimin që të shkaktojë frikë te qytetarët.

“Organet e sigurisë kanë dëshmi për përfshirjen e tij në sulmet ndaj infrastrukturës kritike të Republikës”, ka shkruar ai./Telegrafi/