“Letërsia nga burgu”

Doli nga shtypi libri më i ri i Bajram Kosumit, “Letërsia nga burgu/kapitull më vete në letërsinë shqipe”, botim i Institutit të Trashëgimisë Shpirtërore e Kulturore të Shqiptarëve në Shkup.

Libri ka 350 faqe dhe në të trajtohet letërsia shqipe e krijuar në burg gjatë periudhës 1945-1999. Poetë dhe shkrimtarë shqiptarë që shkruan në burgje, tekstet e të cilëve janë analizuar në këtë libër, janë: Adem Demaçi, Atë Zef Pllumi, Arshi Pipa, Visar Zhiti, Kasëm Trebeshina, Merxhan Avdyli, Ismail Syla, Trifon Xhagjika, Jorgo Bllaci, Genc Leka, Vilson Blloshmi, Havzi Nela, Mehmet Myftiu, Hydajet Hyseni, Pjetër Arbnori, Murteza Xajë Nura, Pano Taçi, Zyhdi Morava, Rexhep Elmazi, Maks Velo, Drita Çomo, Alush Canaj, Frederik Reshpja, Zeqir Gërvalla, Vezir Ukaj, Sylë Mujaj, Besim Zymberi, Rasim Selmani, Berat Luzha, Fazli Greiçevci, Daut Gumeni, Fatos Lubonja, Gani Sylaj, Muhamet Rogova, Emin Kabashi, Kurt Kola, Kolë M. Berisha, Martin Çuni, Enver Topalli, Rrahim Sadiku, Fehmi Berisha, Jahja Lluka, Zhaneta Ogranja etj.

“Hullia e çelur me kohë prej studiuesit Bajram Kosumi, jo vetëm me tërheqjen e vëmendjes ndaj kësaj letërsie, pra ndaj faktologjisë letrare, të lënë anash për shumë kohë, vështruar në distancë kohore, pa mëdyshje shënon njërin nga kontributet e vlerta të autorit në lëmin e botimit dhe të studimeve letrare”, ka thënë për këtë libër studiuesi i letërsisë, Behar Gjoka.