Lëndimi i minatorëve në Stantërg, Krasniqi kërkon hetim të pavarur

Kryetari i PDK-së, Memli Krasniqi, ka reaguar pas ngjarjes së të mërkurës, kur 12 minatorë të Trepçës morën lëndime nga shpërthimi i acidit sulfurik.

Krasniqi ka thënë se “ngjarja e rëndë në minierën e Stantërgut, ku 12 punëtorë të Trepçës kanë marrë lëndime, është shqetësuese dhe kërkon përgjegjësi”.

“Është e domosdoshme të zhvillohet një hetim i plotë dhe i pavarur për të identifikuar shkaqet dhe përgjegjësitë në këtë ngjarje e cila ka mundur të përfundoj me fatalitet”, ka shkruar Krasniqi në një postim në Facebook, transmeton Telegrafi.

“Punëtorëve të lënduar ju dëshiroj shërim të shpejtë dhe mbështetje të plotë në këtë moment të vështirë për ta”.

Ai tha se “Përkundër kërkesave të vazhdueshme ndaj Qeverisë aktuale, minatorët e Trepçës kanë përjetuar mungesën e trajtimit adekuat”.

“Qeveria e Kosovës duhet të dëgjoj kërkesat e minatorëve dhe duhet të ndërmarr veprime urgjente dhe konkrete për të garantuar kushte më të mira dhe siguri në vendin e punës”, ka thënë Krasniqi./Telegrafi/