Lëkura e robotit nga qelizat njerëzore

Pas shumë romaneve dhe filmave fantastiko-shkencor që përshkruajnë qeniet mekanike që ngjajnë shumë me njerëzit, ideja e këtyre llojeve të robotëve na ka magjepsur dhe frikësuar për dekada të tëra.

Tani, falë përparimeve në shkencë, ne jemi më afër se kurrë për t’i bërë robotët të duken si njerëz.

Përkatësisht, ekspertët kanë zhvilluar lëkurën për trupat mekanikë nga qelizat njerëzore. Edhe pse duket pak e rrëshqitshme, një lëkurë e tillë është e papërshkueshme nga uji, mund të shërohet dhe ka një strukturë si e jona, shkruan sciencealert.

“Unë mendoj se lëkura e gjallë është zgjidhja perfekte për t’i dhënë robotëve pamjen dhe ndjesinë e gjallesave, sepse është saktësisht i njëjti material që mbulon trupin tonë”, tha inxhinieri Shoji Takeuchi nga Universiteti i Tokios.

Ekspertët kanë veshur me sukses një gisht robotik funksional me tre nyje me një prototip të lëkurës të rritur në laborator, transmeton Telegrafi.

Shkencëtarët janë përpjekur të vendosin lëkurë të vërtetë tek robotët më parë, por ata kanë hasur në probleme. Prandaj, ekspertët japonezë kanë provuar një qasje tjetër – duke krijuar një lëkurë që formohet vetë në pajisje.

“Është e vështirë të pritet, ngjitet ose qep ekuivalenti i lëkurës pa dëmtuar indet e buta dhe të brishta. Në vend të kësaj, ne e zhytëm strukturën robotike në një zgjidhje të kolagjenit dhe qelizave fibroblaste dermale, qelizat më të zakonshme të indit lidhor të lëkurës”, shpjegojnë shkencëtarët e studimit.

Ata më pas e mbuluan këtë shtresë bazë me qeliza epidermale, një komponent kryesor i shtresës sonë të jashtme të lëkurës. Pa këtë shtresë shtesë, indi nuk do të ishte i papërshkueshëm nga uji.

Edhe pse ky material paksa rrëshqitës ishte në gjendje t’i rezistonte shtrirjes dhe tkurrjes së përsëritur të lëvizjeve robotike të gishtërinjve, ai është ende shumë më i dobët se lëkura e njeriut. Shkencëtarët besojnë se mund ta rregullojnë këtë duke rritur përqendrimin e kolagjenit në tretësirën fillestare dhe duke zgjatur maturimin e qelizave.

Është interesante se kjo lëkurë artificiale mund të kurohet edhe me një fashë kolagjeni, të cilën qelizat e marrin dhe e integrojnë në sistemin e tyre për të riparuar dëmtimin.

Edhe pse këto janë rezultate të mahnitshme, indet e rritura në laborator janë ende shumë të kufizuara. Nuk mund të mbijetojë jashtë tretësirës ushqyese për një kohë të gjatë, sepse, ashtu si lëkura jonë, kërkon një furnizim të vazhdueshëm me ujë për të mos tharë.

“Ne jemi të befasuar se sa mirë është përshtatur indi me sipërfaqen e robotit. Por ky hulumtim është vetëm hapi i parë drejt krijimit të robotëve që janë plotësisht të mbuluar me lëkurë të gjallë,” tha Takeuchi. /Telegrafi/