Presidentja e Bankës Qendrore Evropiane (BQE), Christine Lagarde ka thënë se ekonomia e bllokut ishte kthyer nga buzë gremina, por se nuk ka dalë plotësisht nga kriza pas pasojave të shkaktuara nga shpërthimi i COVID-19.

Duke folur në Forumin e BQE-së të vitit 2021, Lagarde tha se ekonomia po rimëkëmbej me shpejtësi dhe do të arrinte nivelet para pandemisë deri në fund të vitit.

Sipas saj, pas një recesioni shumë të pazakontë, Eurozona po kalonte një rimëkëmbje të ngjashme atipike.

Ajo theksoi se pasiguritë që kërcënojnë rritjen ende vazhdojnë dhe shtoi se kishte pasur ngecje dhe ndërprerje të zinxhirit të furnizimit gjatë disa muajve të fundit.

“Ndërsa rimëkëmbja e fuqishme po mbështet trendet e inflacionit, ajo që ne po shohim tani është kryesisht një fazë e inflacionit të përkohshëm të lidhur me rihapjen. Ndryshimet strukturore mund të krijojnë presione rritëse dhe rënëse mbi çmimet”, tha shefja e BQE-së.

Me faktin që Eurozona është në një pozicion importues të energjisë, shpjegoi Lagarde, rritja e çmimeve të energjisë është shkaktuar nga gazi natyror, energjia elektrike dhe nafta.

BQE-ja pret që çmimet e energjisë të ulen në pjesën e parë të vitit 2022 me një burim tjetër pasigurie që është përsëritja e masave dhe mbylljeve me valën e re të pandemisë. /Telegrafi/