LAJMI I FUNDIT:

Kurti priti në takim ligjëruesen britanike të Teorisë Politike, diskutojnë për situatën politike në Kosovë e Shqipëri

Kurti priti në takim ligjëruesen britanike të Teorisë Politike, diskutojnë për situatën politike në Kosovë e Shqipëri

Kryeministri i Republikës së Kosovës, Albin Kurti, priti në takim ligjëruesen e Teorisë Politike në Departamentin e Qeverisjes në London School of Economics, Lea Ypi, njëherësh autore e librit të posabotuar në Londër dhe në Tiranë, “Të lirë – Të rritesh në fund të historisë”.

Kurti dhe Ypi diskutuan mbi situatën politike në Kosovë dhe në Shqipëri, sfidat dhe përvojat e qeverisjes.

Kështu është bërë e ditur përmes një komunikate për medie nga kryeministria.

“U pajtuan se orientimi progresist në të dy shtetet duhet shprehur në reformë të thellë sociale dhe administratë publike cilësore. Biseduan edhe për realizimin e programit dhe të arriturat e Qeverisë së Kosovës përgjatë nëntë muajve, si edhe për zhvillimet aktuale politike në Britani të Madhe, BE dhe më gjerë”, thuhet në komunikatë.

Lea Ypi ka ardhur në Prishtinë për të promovuar librin “Të lirë – Të rritesh në fund të historisë”, që aktualisht po përkthehet në 15 gjuhë.

Kurti e përgëzoi Ypin për suksesin që ka shënuar libri i saj që në muajin e parë të botimit dhe i dëshiroi suksese të mëtejshme. Libri trajton periudhën e viteve ‘80, para rënies së komunizmit në Shqipëri, të shikuar nga sytë e një fëmije.

Ypi është autore edhe e librave “Global Justice and Avant-Garde Political Agency” dhe “The Architectonic of Reason”, si dhe bashkëautore e disa librave të tjerë.

Libri “Migration in Political Theory” (bashkë me Sarah Fine) është renditur ndër titujt më të lexuar në katalogun e Oxford University Press. Ajo ka marrë çmim nga Akademia Britanike për ekselencë në​ shkencat politike. /Telegrafi/