Derisa talebanët kanë përparuar nëpër qytetet kryesore të Afganistanit, pamjet e publikuara më poshtë shfaqin disa luftëtarë të tyre duke luajtur në luhatëse dhe rrëshqitur në tobogan – e pamjet e momentit të “argëtimit” të tyre në parkun e fëmijë janë bërë virale në rrjetet sociale.

“Bëje me shpejtë”, dëgjohet duke thënë një taleban derisa filmon bashkëluftëtarët e tij që lëviznin para-pas, transmeton Telegrafi.

“Ky park është i yni. Ata (qeveria afgane) janë kënaqur gjatë piknikëve, tani e kemi radhën ne”, shtoi talebani.

Në një video tjetër dëgjohen duke bërtitur, derisa “kënaqeshin” duke rrëshqitur në toboganin spiral për fëmijë. Megjithatë nuk dihet lokacioni i saktë se ku janë filmuar talebanët.

E qindra afganë kanë komentuar në Twitter dhe Facebook, shumica prej tyre thoshin se pamjet janë dëshmi se pas disa dekadave luftime, ka bërë që gjenerata të tëra të mos e shijojnë fëmijërinë dhe se tani në moshën e pjekurisë po tentojnë ta kompensojnë.

Disa tjerë thoshin se miliona afganë jetojnë në frikë pasi që luftëtarë të tillë po udhëheqin një betejë tejet të përgjakshme.

Ndryshe talebanët kanë marrë nën kontroll disa rajone, që kur forcat ndërkombëtare filluan tërheqjen e trupave të tyre nga Afganistani që nga 1 maji. /Telegrafi/