Kuleba për pezullimin e ndihmës amerikane: Ishte një incident, SHBA-të e dinë se çfarë është në rrezik

Ministri i Jashtëm i Ukrainës, Dmytro Kuleba, tha se beson se pezullimi i ndihmës së SHBA për Ukrainën pasi Kongresi nuk e përfshiu atë në një ligj të përkohshëm, ishte në fakt një incident i izoluar, jo diçka sistematike, raporton CNN.

“Çështja është nëse ajo që ndodhi në Kongresin e SHBA fundjavën e kaluar ishte një incident apo sistematik”, tha Kuleba në margjinat e një takimi me ministrat e Jashtëm të Bashkimit Evropian, transmeton Telegrafi.

“Mendoj se ishte një incident. Ne kemi diskutime shumë të detajuara me të dyja pjesët e Kongresit, me republikanët dhe demokratët. Ata e morën këtë vendim duke marrë parasysh sfondin, domethënë bllokimin e mundshëm të punës së qeverisë amerikane. Por ne nuk e konsiderojmë se mbështetja e SHBA-së është tronditur, sepse Shtetet e Bashkuara të Amerikës e kuptojnë se çfarë rreziku është Ukraina. Problemi është shumë më i madh se Ukraina, ka të bëjë me stabilitetin e botës”, shtoi Kuleba.

Lexo po ashtu Ukrainasi shkatërron me mortajë shtëpinë që rusët e përdornin si bazë – publikohen pamjet

Kujtojmë se Kryetari i Dhomës së Përfaqësuesve, Kevin McCarthy, nuk përfshiu ndihma prej gjashtë miliardë dollarësh në ligjin e përkohshëm, që duhet të parandalojë një mbyllje të qeverisë amerikane.

Në anën tjetër SHBA është vendi që më së shumti ka ndihmuar Ukrainën që nga fillimi i pushtimit rus në këtë vend, duke i dhuruar miliarda dollarë ndihmë ushtarake. /Telegrafi/