Kthehen në Shkup por nuk vijojnë shkollimin pas azilit në Belgjikë (Video)

Familja Berisha nga Gazi Baba e Shkupit para pesë muajve është kthyer nga Belgjika, ku atje kishte qëndruar me status të azilit. Por tani pas kthimit, dy fëmijët e tyre, Ruzhdiu 13 vjeç dhe Brusha, 8 vjeç nuk po vijojnë shkollimin, pasi që nuk kanë dokumentet e shkollës ku kishin qëndruar azil dhe se për këtë ata nuk pranohen në shkollën “Kongresi i Manastirit” në lagjen e tyre.

“Unë po ndihem shumë keq, se nuk po jam në shkollë, po në kërkojnë dokumente nga shteti i Belgjikës. Gjithë ditën po jam në shtëpi, po më thërrasin shokët hajde në shkolle, unë po ju them s’mundem”, thotë Ruzhdiu.

Babai i dy fëmijëve thotë se nuk mundet të shkojë në Belgjikë për të siguruar dokumentet e nevojshme, sepse kanë ndalesë për hyrje në këtë shtet.

“Unë i thashë drejtorit, për t’i marrë fëmijët në shkollë, mua më tha jo, sepse nuk mundet nuk kemi informata se çfarë klase kanë vijuar atje. Duhet të marrim dokumente, më pas të shkohet në ministri, unë ku të gjejë letrën atje”, sqaron babai i fëmijëve Harun Berisha.

Drejtori i shkollës fillore “Kongresi Manastirit”, Faik Xhoni thotë se dokumentet e tilla janë të domosdoshme për tu siguruar, njofton tv21.

“Ne jemi të gatshëm të pranojmë, të sigurojmë çdo dokument edhe ai dokumente nëse sillet nga vendi ku ka mësuar nxënësi, duhet të shkojnë në ministri të arsimit të nostrifikohet ai dokument dhe pastaj ne do ti pranojmë”, tha Faik Xhoni.

Familja Berisha për pesë vite ka qëndruar në Belgjikë, por pesë muaj më parë iu refuzua azili dhe janë deportuar për në Maqedoni, ku po përballen me probleme sociale. /Telegrafi/